ЈСП: Со новиот еднодневен билет поевтинува превозот
Еднодневниот билет кој ќе чини 120 денари ќе почне да се продава во билетарниците веднаш штом Советот на Град Скопје ќе даде позитивно светло, а според очекувањата на директорот на ЈСП Скопје, Иван Илиевски, тоа ќе се случи до крајот на месецов. Тој денеска во Утрински брифинг рече дека воведувањето на ваква новина во јавниот превоз ќе значи олеснување на буџетот на граѓаните кои ретко го користат автобускиот превоз, но истовремено ќе овозможи полесен пристап до автобусите на туристите и граѓаните од внатрешноста.
- Еднодневниот билет ќе биде даден на користење на хотелите, туристичките агенции и ќе најде широка примена за користење во Скопје. Билетот ќе важи од пет часот наутро до 12 часот навечер, неограничено на сите линии. Цената од 120 денари е поевтинување од претходниот електронски билет кој можеше да се користи преку електронски паричник и чинеше 270 денари, со тоа што се купуваше неперсонализирана електронска картичка која чпини 150 денари и истата се надополнуваше со 120 денари кредит за возење. Тоа значи дека со користењето на овој хартиен билет цената на возење ќе поевтини околу сто проценти, а дополнително ќе го олесни користењето ја јавниот превоз на луѓето кои не користат скопска електронска картичка, вели Илиевски.
Тој нагласува дека нема да има поскапување на цената на билетите, но вели ќе биде голем предизвик да се менаџира претпријатието со оглед на финансиската состојба во кое го затекнал.
- Претпријатието се наоѓа во големи финансиски долгови. Обврските кон добавувачите се 240 милиони денари, долговите кон приватните превозници се движат околу 70 милиони денари. Последниот девет месечен извештај покажува дека претпријатието е два милиона евра во загуба, што значи предизвикот е голем, но новото раководство со домаќинско работење ќе најде начин во 2022 година финансиски да го стабилизира. Ќе работиме и на враќање на духот кај вработените но и подобрување на јавниот превоз, бидејќи скопјани заслужуваат достоинствен и сигурен јавен превоз.
ЈСП преку градот Скопје упати барање до Владата за финансиска помош, која ни е енеопходна откако поскапе метанот. Се надеваме дека ќе наидеме на разбирање бидејќи ЈСП преку потрошувачката на нафтените деривати одвојува големи средства за еколошката такса. Се надевам дека мал дел од тие средства ќе се вратат во ЈСП во форма на субвенциите поради поскапувањето на метанот. Дури и да не добиеме помош од Владата, тоа нема да се одрази врз работењето на претпријатието, вели директорот на ЈСП.
Низ Скопје секојдневно сообраќаат 270 автобуси, нема рестрикции во однос на сообраќајните линии.