Шест освоени медали на Меѓународна јуниорска олимпијада по природни науки
Шест млади натпреварувачи од Македонија освоија медали на Јуниорската Олимпијада за природни науки во Дубаи. Двајца од нив, Алексиј Тасиќ кој освои сребрен медал и Матеа Митревска која освои бронзен меал денеска во Утрински брифинг зборуваа за искуството и освоените медали.
- На Олимпијадата се натпреваруваа 400 натпреварувачи од 80 земји. Ова за мене е прво учество на големо натпреварување од интернационално ниво. Во многу голема конкуренција успеав да освојам бронзен медал, што ме прави да се чувствувам особено горда., вели Матеа.
Подготовките за Олимпијадата започнале од септември, а се одвивале на Природноматематичкиот факултет.
- Секоја недела на Природноматематичкиот факултет се подготвувавме по предметите физика, хемија, биологија. За мене ова е многу значајна награда бидејќи ја добивме во многу силна конкуренција од цел свет. За нас е ова поттик за понатамошен напредок. Имаме време и за дружење и за напредување во училиште, но и за подготовки за натпревари, вели Алексиј, кој на Олимпијадата освоил сребрен медал.
Друштвото на физичари на Македонија веќе 62 години организира регионални натпревари.
- На Меѓународната олимпијда учествуваме од 2017 година со ученици до 15 години кои се натпреваруваа во областите биологија, хемија и физика. Заеднички со сојузот на хемичари и технолози на Македонија, друштвото на физичари на Македонија и македонското биолошко друштво ги избираат најдобрите шест ученици секоја година за да се натпреваруваат на олимпијадата. Среќни сме што бележиме континуиран успех. На почеток имавме само еден бронзен медал, подоцна три, пред две години освоивме пет медали, а оваа година сите наши ученици освоија медал. Изборот на ученици е страшно суров. Почнува со општински натпревари, регионални и државни натпревари по секоја од областите. Најдобрите се собираат на два селекциони натпревари, по што започнуваат подготовките на природно математичкиот факултет, вели професор Ламбе Барандовски од ПМФ.
Професорот вели дека има помал интерес за изучување на природните научи, за разлика од општествените.
- Нашите студенти се едни од најдобрите кои се запишуваат на факултетите во државата. Условите за работа на ПМФ се одлични. Едуцирајќи ги на овие факултети се надевам дека овие студенти во иднина ќе ја развиваат науката и да се фатат во борба со најгорливите проблеми кои го засегаат човештвото, додава Барандовски.
На Олимпијадата медали освои
Алексиј Тасиќ, сребро (ПСУ Јахај Кемал, Скопје)
Иван Костевски, бронза (УСО Славчо Стојменски, Штип)
Андреј Стојановски, бронза (ПСУ Јахај Кемал, Скопје)
Марио Ванчоски, бронза (УСО Славчо Стојменски, Штип)
Матеа Митревска, бронза (ПСУ Јахај Кемал, Скопје)
Теона Ана Георгиевска, бронза (ООУ Љубен Лапе, Аеродром).