Шабан Мемети: Имаме капацитет да направиме до 3.000 тестирања дневно, а правиме околу 400, во пикот на пандемијата правевме 1.500
Моменталната епидемиолошка состојба во државата се карактеризира со широко распространета вирусна инфекција, но намален е бројот на регистрирани позитивни инфекции во однос на минатата недела, рече денеска во Утрински брифинг директорот на Институтот за јавно здравје, Шабан Мемети.
- Од вкупниот број направени тестови, 18,8 проценти се позитивни, додека за 45 проценти е намален бројот на смртните случаи за разлика од минатата недела. Во болничките капацитети се лекуваат околу 420 пациенти, што е намалување за околу 30 проценти во однос на минатата недела. Согласно намалувањето на бројот на заразени и умрени од ковид, Комисијата за заразни болести планира да ги намали рестриктивните мерки, но јас би препорачал да се внимава затоа што може како бумеранг да ни се врати големиот број на позитивни лица, вели Мемети.
За време на двегодишната пандемија голем број граѓани беа принудени тестирањата да ги прават во приватни лаборатории, како последица на немањето слободни термини за тестирање во државните лаборатории. Директорот на Институтот за јавно здравје вели дека проблемот треба да се бара во Министерството за здравство кој всушност е креатор на „Мој термин“.
- „Мој термин“ е под Министерство за здравство, а токму преку оваа апликација се прави распределба на террмините за тестирање. Ние во најтешките моменти на кризата правевме до 1.500 тестови дневно. Сега имаме капацитет да направиме до 3.000 тестови на ден, а правиме околу 400. Треба да се побара објаснување од Министерството зошто не дозволува тестирање на поголем број пациенти, туку истите се принудени да плаќаат за овие услуги.
Во однос на скринингот кај учениците, Мемети нагласува дека треба да се тестираат што е можно поскоро другарчињата на учениците кои добиле позитивен тест на скринингот.
- Епидемиолозите се тие кои прават проценка дали најблиските контакти на позитивните се асимптоматски и дали треба да се тестираат или да се изолираат, објаснува Мемети.