Скерлев: Срамота е што Британија прими само 350 украински бегалци

Влегуваме во третата недела од почтокот на руската инвазија врз Украина, а во меѓувреме се одржаа неколку рунди преговори кои не вродија со плод. Руската армија постепено се доближува до Киев, по што малку е веројатно дека ќе има преговори.

-Сите оние што велеа дека ова ќе трае кратко, вклучително и Путин кој мислеше дека ќе направи блиц криг па потоа ќе поставува услови, згрешија. Ова ќе биде прилично долго и тоа го сфаќаат и во ЕУ и во Велика Британија. Британците како да се помирени со тој факт и се вртат кон помош на Украина од една страна, а од друга ја поттикнуваат британската влада од зборови да премине на дела, вели Жанета Скерлев за денешен Утрински брифинг.

Конфликтот предизвика бран од бегалци, а главно станува збор за жени и деца. Европа го прима овој голем број бегалци, а под најголем удар е Полска.

-Срамота е што Британија прими само 350 бегалци. Одбивањето да се примаат бегалци беше и причината за Брегзитот. Прво се зборуваше дека ќе се отвори бегалски камп со биометриски проверки во Кале и Лил во Франција. Но, ништо не се случува. Таму има само двајца полицајци и се продава кока кола и чоколатца. Дури и луѓе кои имаат роднини во Британија не моат да се спојат со своите семејства, вели Скерлев.

Наводно, она што ги прави британските власти претпазливи е стравот од инфилтрирање руски шпиони. Јавна тајна е дека Лондон е голема пералница на пари, а премиерот Борис Џонсон рече дека ќе се справи со руските олигарски. Но, таа борба се сведе на затврање на продавницата на сувенири на фудбалскиот тим Челзи кој е сопственост на Роман Абрамович, вели Скерлев. Таа додава дека Џонсон го пропушти моментот да биде политичар од типот на Черчил, па сега се свртува кон политиката на Тачер.