Проф. д-р Марковиќ: Заев и Ковачевски се драстично различни, едниот беше преемотивен другиот е воздржан

Во релативно демократска атмосфера во Собранието синоќа беше изгласана новата влада.

-Мислам дека дојде до деескалација на тој негативен полнеж што го имаше по локалните избори со тоа што дојде до избор на нова влада во една релативно нормална атмосфера. Тоа што недостасуваа два гласа од мнозинството не е ништо проблематично, некој може да не се согласи со кадровската политика. А работа на опозицијата е да критикува, вели за Утрински брифинг проф. д-р Ненад Марковиќ.

Оној кој ја персонализирае политиката, Зоран Заев некако исчезна од сцената и сега доаѓа до некаква деескалација на атмосферата што можеби е добро.

-Заев и Ковачевски се сосема различни. Не знам дали е намерно избран поради тоа. Заев имаше еден доминантен патос на кој некои реагираа со поддршка, но кај некои предизвикуваше потсмев. Меѓутоа, Ковачевски е друг тип на политичар. Кај него тешко се читаат емоции, тешко се читаат намери и е енигматичен. Тој за јавноста е енигма и ќе видиме колку долго ќе остане така. Битно е тој што ќе испорача и битен е првиот впечаток. Прв впечаток не се остава двапати. Првите неколку четкори што ќе ги преземе се клучни. Сега ги нема Заев и Филипче, кои беа најекспонирани и најмногу беа изложени на критики. На нивно место има нови фигури и негативниот полнеж исчезнува, вели Марковиќ.

Затоа не е за изненаување што опозицијата инсистира да го оквалификува Ковачевски како „пион на Заев“. Утре во Скопје доаѓа новиот премир на Бугарија Кирил Петков кој дава воздржано политички најави за промени на политиката.

-Сакам да сум умерен песимист. Многу пати досега спорот за малку ќе се решеше, така се најавуваше. Проблемот не е во Петков, тој има коалициска влада – социјалистите и партијата на Слави Трифонов пред доаѓањето во Скопје го опоменаа да не ја омекнува позицијата за време на посетата. Тоа е комплексна коалиција и од средбата утре може да се очекува запознавање, вели Марковиќ.

Марковиќ додава дека Заев неоправдано влеваше оптимизам оти оваа приказна ќе трае многу долго. Може да се случи промена ако се случи некакво драматично отстапување од некоја од страните.

Неодамна имаше дебата за историските проблеми на Балканот. На неа Марковиќ рече дека политиката на Бугарија кон Македонија е всушност расправија со Белград.

-Истото тоа го покажуваат и членовите на историската комисија од страна на Бугарија. Бугарија нема средства со кои би му се спротивставила на Белград. Бугарските политичари имаат искривена претстава дека во Македонија има југоносталгија. Бугарија нема политички инструменти оти Србија не е заинтересирана за ЕУ. Ако не можете по магарето, ќе удрите по самарот. Бугарија има желба да влезе во пресметка со Белград а го нема инструментот, вели Марковиќ за Утрински брифинг.

Левица вчера се обиде да нагласи дека ова е предавство на македонските итереси оти во новата влада седат 10 министри Албанци и 11 министри Македонци. Но, сите Албанци што седат во владата не се од ДУИ.

-Ние сме склони кон броење крвни зрнца. На Апасиев не му пречеше присуството на Албанци кога сакашше да ја урне владата. Факт е дека секоја влада е предмет на преговори. Но, ние како граѓани не бараме министри од одредена политичка партија туку успешни министри кои можат да испорачаат. Сѐ уште не сме го надминале чувството на одбивност кон другиот етникум оти таква атмосфера се создаде во земјата, вели Марковиќ.

Проследете го целиот разговор во видеото