Проф. Дујовски: Руската војска не е она што се претставува во светот, ако се изземе нуклеарната моќ

Сите анализи од пред една недела се застарени и започнува една сосема нова ситуација. По влегувањето на Русија и инвазијата која тргна по некоја инерција

-Не треба да сме многу оптимисти, но да се надеваме дека преговорите ќе вродат со плод. Ми се чини дека овој конфликт не може да заврши толку бргу затоа шшто двете војски се вклучени во таа мера што не би можеле брзо да ги напуштат освоените позиции. На терен состојбата сѐ повеќе ескалира. Од утрово има сериозно навлегување на руски бродови, а интернет војната продолжува. Ќе треба да се подготвиме за една подолга војна, вели за Утрински брифинг проф. д-р Никола Дујовски, декан на Факултетот за безбедност.

Русија не успеа да изведе блиц-криг, но целите и намерите остануваат исти.

-Таму не страдаат само воените објекти. Третиот ден стана јасно дека Донбас не е целта туку Путин сака да ја преземе власта во Украина и да донесе свои луѓе. Но, јасно е дека руската војска не е она што се претставува во светот, ако се изземе нуклеарната моќ. Руската армија е немотивирана. Европа и НАТО имаат воедначен одговор, вклучително и воена помош за Украина. Балансот на силите се преместува во полза на Украина, вели Дујовски.

Според Дујовски, Русија до неделата употреби 40 отсто од војската за инвазија на Украина и видоа дека не можат па го зголемија бројот на 75 отсто од војската. Загрижува најавата за учество на Белорусија во овој конфликт, вели Дујовски.

Во Украина има општа мобилизација па нејзината војска од 275 илјади се искачи на милион. Западни аналитичари велат дека Путин нема да запре само на Украина, како што не запре само на Донбас како што рече. Со продолжување на војната и сѐ поголемите санкции, народот во Русија ќе се соочи со проблеми.

-Состојбата во Македонија треба да се следи регионално, ние сме членка на НАТО и сме безбедни. Директни безбедносни импликации, независно што ќе се случува, за Македонија нема да има, вели Дујовски.

Слободата на говорот треба да биде неприкосновена, а руските канали во Македонија не верувам дека биле многу следени, вели Дујовски.

-Ова не е казна за рускиот народ туку е порака дали вакво раководство им носи бенефит. Ние сме долги години изложени на лажни вести кои ни ја искривија перцепцијата за тоа што е демократија, а добар дел од нив се финансирани од Русија. Пропагандата секогаш е број еден. Не сум загрижен што се забрануваат РТ и Спутник во Македонија, вели Дујовски.