Попоски: Ако опозицијата биде поконструктивна во односот со Бугарија, тоа ќе биде и во нејзина полза

Новиот бугарски премиер и новиот македонски премиер денеска остварија прва официјална средба среде заглавените односи меѓу двете земји.

-Ова може да биде нов почеток, но не знаеме како ќе се одвиваат разговорите. И во двете земји веќе ги нема политичките елити кои го потпишаа договорот за добрососедство, па немаат директно влијание. Сега Петков и Ковачевски имаат чист терен иако со тегови закачени за нозете. Имаат шанса да направат пробив, но толку се силни националистичките расположенија во двете земји па не верувам дека тоа ќе биде лесно, вели Љупчо Поповски.

Бугарската позиција благо се помести последниве месеци откако сфатија дека претходната стратегија не ги води никаде и откако добија критики од сојузниците во ЕУ. Нам повторно не ни е јасно што сакаат Бугарите од нас, освен да нѐ нема.

-Тие се дел од Унијата, дел од НАТО, и не може врз нив да се удри со чекан. Не може да се рече дека само Македонија е во сѐ во право. Во овдената јавност погрешно се претставија заклучоците од Советот за безбедност на бугарскиот претседател Румен Радев. Кај нас беше претставено дека тие испраќаат нов катиљ-ферман, но мислам дека треба повнимателно да се гледа на овие работи. Во заклучоците не се споменува историја и не се споменува идентитет. Во нив се зборува за заштита на бугарско малцинство во Македонија, да се направи акциски план, да се направи Коридорот 8 и да се оствари дијалог меѓу двата парламента. Тоа е различно од изјавата на Радев, вели Поповски.

За ваквиот начин на пренесување на нештата одговорност има и опозицијата во двете земји. Кај нас се потпишуваат петиции со радикална содржина, а МАНУ излегува со провокативни изјави.

-Би сакал да ги видам стенограмите од вечерашниот разговор на Петков со Христијан Мицкоски во седиштето на ВМРО-ДПМНЕ. Петков со овој гест прави чест. Мицкоски вчера рече новинарите да го прашаат Петков чиј е Гоце Делчев. Зошто новинарите да ја вршат валканата работа? Тоа може и Мицкоски да го праша, вели Поповски.

Поповски вели дека ако македонската опозиција биде поконструктивна нашите позиции ќе бидат подобрени. Според него, не верува дека опозицијата сака замрзнат конфликт со Бугарија што пречи на евроинтеграциите оти кога ќе дојде на власт ќе се соочи со поголем проблем.

Целиот разговор погледнете го во видеото