Поповски: Украинскиот и македонскиот национализам се појавуваат истовремено, но има разлика

Темата на Викенд колумната е еден феномен кој за македонски прилики може да биде и близок и далечен, односно за украинскиот национализам во светло на обвинувањата на Путин дека Украина е вештачка творба во која има национализам и нацизам.

-Ситуацијата со Украина и Македонија многу наликува. Украинскиот национализам се појавува некаде во 1880 години во време кога Русите ги сметаат за Малоруси, а Австроунгарците за покраина. Станува збор за сличност на две нации кои биле без држави. Кога се распаѓаат двете големи царства, руското и австроунгарското, почнуваат движена за формирање на држави врз основа на националноста, вели новинарот и колумнист Љупчо Поповски за Утрински брифинг.

Поповски вели дека разликата меѓу украинскиот и македонскиот национализам е во периодот на Втората светска војна кога Македонците развиваат отпор кон окупаторот кој и да се, додека Украинците развиваат национализам соработувајќи со окупаторот во контекст на нивната борба против Советскиот Сојуз и Евреите. Од друга страна, Украинците имаат дадено огромен број човечки жртви во ослободителната борба во Втората светска војна, вели Поповски.

Поповски коментира дека главна тема на македонските историчари, дури и од времето на социјализмот, се случувањата и личностите од преродбеничкиот период, од ВМРО, кон крајот на 19 век. Во меѓувреме, нема детални истражувања за либерализмот во Македонија во времето на Југославија, ниту нешто повеќе за улогата на Лазар Колишевски или Крсте Црвенковски чиишто документи стојат во МАНУ.

-Нелогично е јавноста да не се занимава со францускиот предлог. Ние треба да се занимаваме со тоа, но внимателно. Во право се пораките од Владата дека нема потреба ние да се изјаснуваме за нешто што не ни упатено директно нам туку на институциите на ЕУ. Нека се произнесат прво земјите членки на ЕУ и во ЕК, па потоа ќе видиме дали и како ќе реагираме, вели Поповски за предлогот на францускиот претседател Емануел Макрон за решавање на спорот со Бугарија.

Поповски вели дека малку е нелогично луѓе кои биле во власта постапуваме внимателно, за сега кога не се во власта да велат дека сегашната Влада мора да донесе и изнесе став.

-Ако погледнеме грубо, во тој француски предлог нема ништо што поразлично од моделот 4+1, тоа е она за што веќе разговараме. Никаде не се споменува Рамковната позиција на бугарското собрание и слично, туку се споменуваат договорот со Бугарија и Преспанскиот договор. Еднстраните декларации во овој предлог ги нема, ги има само билатералните и оние во кои е вклучена Европската унија, вели Поповски.

Поповски вели дека очите на Европа се свртени кон Украина, а не кон Западен Балкан и дека тоа е за очекување.

-Завршена е таа приказна дека времето работи за нас. Времето не работи за нас. Ние драматично губиме време. Мора да сфатиме дека времето нѐ прегазува и дека нешто мораме да преземе, заклучува Поповски.