Поповски: Постојат потешки меѓудржавни спорови од нашиот кои се решиле

Како во Европа се преговарани спорови меѓу две соседни земји е тема на последната колумна на коментаторот Љупчо Поповски, кој заклучува дека тоа се проблеми кои не можат брзо да се решат, траат со години, а во случајот со Чешка и Германија преговорите се воделе тајно за да не можат да се попречат.

-За секој народ неговите проблеми изгледаат најголеми. Но, ако земеме предвид што се случувало со злосторствата на фашистите во Чешка, па протерувањето на Судетските Германци кои биле три милиони луѓе на кои им се одземени имотите и правото да се вратат, неспоредливо е со овој проблем што сега го имаме, вели Поповски за Утрински брифинг.

Декларацијата што во врска со ова ја донеле Чешка и Германија е документ во кој двете земји не се согласуваат во сѐ, како што е на пример Минхенскиот договор, но и двете страни можеле да живеат со ова. Доволно е да се знаат позициите и да се разговара, вели Поповски за Утрински брифинг.

Старите грешки не можеме да ги исправиме со нови грешки, а овој Договор е со цел да ѝ овозможиме на Чешка да влезе во НАТО и ЕУ, стои во договорот меѓу Германија и Чешка.

-Приказната има два краја. Сега двајцата нови лидери Петков и Ковачевски се неоптоварени од минатото и имаат шанси да го решат спорот. Но, мора да покажат поинаква политичко филозофска визија за да го решат, оти само со економски мерки не може да се направи. Настаните што го предизвикаа барањето на правата на Бугарите во Македонија, предизвика спирала во која сега повеќе се инсистира на правата на Македонците во Бугарија со што се комплицира ситуацијата, вели Поповски.

Поповски вели дека е добар пристапот да се направи комплекс прашања околу која двете страни во историската комисја се согласуваат, оти оние во кои не се согласуваат може да се разговара и подоцна. Тој додава дека Франција и Германија за учебниците преговараат уште од 1932 година, но имаат меѓусебни односи и соработка.