Петров: Верувам дека Ковачевски има потенцијал да ја обедини партијата и да постави соодветни кадри

Андреј Петров поранешниот градоначалник на Општина Карпош и висок функционер во СДСМ повторно се врати активно во редовите на партијата како член на Извршен одбор на СДСМ.

-Моја желба е да дадам свој придонес со свои ангажмани кои не ми се туѓи, сум ги имал и порано. Мое очекување е дека ќе има добра динамика и верувам дека новиот претседател на партијата Димитар Ковачевски и од денеска нов мандатар, ќе знае како да ги интегрира луѓето, ќе делува позитивно, ќе покаже добри технократски и менаџерски способности кои ги има и како човек кој е без политички багаж, јас верувам дека може да биде нова перспектива на државата, рече Петров во гостувањето на Утрински брифинг.

Тој се осврна на најавените совети кои ќе се формираат во партијата и за нивната улога.

-Се работи за тела со советодавна улога и добро е во нив да се дискутираат дел од политиките и кои ќе бидат супервизори на тоа како се спроведуваат политиките. Генерално, партиите кои се на власт имаат проблем со контрола на тоа што го имплементираат, какви се импресиите од јавноста, што е тоа што е прифатливо или не прифатливо, каде е тоа што треба да се промени зошто тврдоглавото туркање на она што не народски „не пие вода“ не е добро. Затоа ова е една одлична можност со еден исклучителен човек кој ќе го води тоа, мислам дека е позитивно, рече Петров.

По оставката на Заев, Петров смета дека ќе има ново обединување во партиските редови и токму новиот претседател Ковачевски е вистинскиот човек за тоа.

-Идејата иницијална е добра, да се почитува секој и да има доволно интегритет да работи самостојно. Народот кажал „сложни браќа куќа градат“, ако има добро разбирање, мислам дека може се успее. Мора различните мислења да се соочат, дури и некогаш чекор назад да се повлече. Новото раководство со Димитар Ковачевски има силен потенцијал, силен интегративен потенцијал, силна проевропска и проатланска ориентација во себе, рече Петров.