Петковски: Мора да бидеме солидарни, а нашите граѓани сакаат да донираат за стартапи

Постои иницијатива за соработка меѓу Општина Охрид и една невладина приватна фирма, Стелар солушнс, за обновување и пренамена на касарната во Охрид, која ја дели судбината на други касарни во Македонија.

-Повеќето касарни се доделени на општините од страна на Министерството за одбрана и се на добри локации. Охридската касарна е на прекрасна локација, а нашата иницијатива е во следните десет години од тоа место да се направи рекреативно-технолошки парк. Станува збор за локација за ИТ секторот чиишто производи лесно се извесуваат. Го одбравме името Касарна Хаб, вели Љупчо Петковски од организацијата Инохаб.

Охрид главно се третира како туристички центар. Но, ова е добар проект и е поддржан од Европската унија, вели за Утрински брифинг градоначалникот на Охрид Кирил Пецаков. Предвидени се голф терени, спортски игралишта, трим патека, а што се однесува до технолошкиот дел има контакти со фирми од Израел и Чешка, вели градоначалникот.

-Има можности за соработка со централната власт, но засега нема потреба оти земјиштето е на општината, вели Пецаков. Пецаков додава дека за овој стартап центар се разговара и со локалните ИТ фирми и со Факултетот за информатика.

Ова е амбициозна идеја и мора да биде одржлива. Петковски вели дека добро е што уште на самиот почеток ќе се изработи стратегија за функционирање на центарот која треба да ја одобри градскиот совет.

Инохаб е мало здружение на граѓани кои ги реализираат своите идеи преку здружението. Најиновативниот дел на Инохаб е дигитализацијата и малите НВО-а преку апликација можат да се пријават и да аплицираат за донации.

-Македонците донираат, нашите граѓани донираат. За неколку дена се собрани над 5.000 евра за еден фандрејзер, вели Петковски кој додава дека постои простор за овој вид филантропија.