На утрешниот осмомартовски марш жените ќе побараат мерки против сиромаштијата
Утрешниот марш по повод 8 март, во организација на Платформата за родова еднаквост ќе се одржува под слоганот „Сиромаштијата има женско лице“.
„По изминативе две години на пандемија со Квод -19, нашите истражување покажуваат, а и секојдневно гледаме дека жените се многу повеќе осиромашени од секој аспект и од социјален, економски и здравствен, а од друга страна беа на првите борбени линии кога станува збор за борбата против пандемијата и кога станува збор за грижата за децата, домот, а и како здравствени работнички.
Во текот на утрешниот марш ќе говориме на неколку различни теми: колку се почитува родовата еднаквост или колку навистина ја има особено учеството на жените во политичкиот и јавниот живот. Имаме 17 мажи и само 4 жени во владата. Уште попоразувачки е фактот што имаме само две жени градоначалнички. Исто така, жените од маргинализираните групи: невработените, жените од руралните средини, жените Ромки, во текот на пандемијата беа целосно исклучени, најпрво во делот до пристапот на информации, потоа немаа пристап до социјални, здравствени услуги. Голем дел останаа без работа, особено самохраните мајки. Утре од владата же побараме жените многу повеќе да бидат вклучени во процесите на донесување мерки и политики кои се однесуваат на излез од ковид кризата. И особено систематски да им се помогне на самохраните мајки, Ромките, жените од руралните средини и другите маргинализирани групи. Барањата се во насока за поголема родова еднаквост, барем 40 отсто застапеност на жените во извршната и локалната власт“, вели за Утрински брифинг, Лилјана Јоноски, извршна директорка на „Рурална коалиција“.
Таа додава дека „Рурална коалиција“ работи да ги врати жените во земјоделското производство, особено кога во периодот на пандемијата пазарите не работеа и владееше страв. Организацијата работи на тоа да се зголеми количеството на земјоделски преработки, бидејќи тие главно се увезуваат, како и на промоција на женското земојделско производство. А го отворија и онлајн пазарот „Наша тезга.мк“.