Мојсова-Чепишевска: Бугарски научници се’ уште приватно доаѓаат на Семинарот за македонски јазик
Во пресрет на 5 мај, денот на македонскиот јазик, Весна Мојсова-Чепишевска, директорка на Меѓународниот семинар за македонски јазик, литература и култура при УКИМ смета дека јазикот е во добра состојба иако иам простор да се зголеми степенот на негова афирмација.
„Ако тргнам од она што го знам како директор на Меѓународниот семинар за македонски јазик, литература и култура, македонскиот јазик е во добра кондиција, бидејќи ги следам оние работи што се врзани со странските универзитети и нашето котирање на странските универзитети, односно желбата за изучување на македонскиот јазик на овие универзитети преку лекторати и секако преку катедри затоа што не секаде каде што има лекторат имаме катедра по македонски јазик и обратно. Така што еве 55 години Меѓународниот семинар за македонски јазик, литература и култура се грижи за тоа и ако е во еден таков континуитет е таа грижа за македонскиот јазик, мислам дека јасно е дека е во добра состојба, јас имам такво чувство, иако секогаш можеме да кажеме дека моравме и можевме повеќе но сега е работата дане гледаме наназад, туку да видиме што можеме од сега, од оваа позиција, од денес, од 2022 година па натаму што може да направиме“, вели за Утрински брифинг професорката Мојсова-Чепишевска.
Таа открива дека следен лекторат за македонски јазик се планира да се отвори во Анкара, Турција.
„Отворањето на нов лекторат е комплексно прашање. Најпрвин секако дипломатијата прави еден вид на испитување дали во некоја одредена средина има навистина интерес за македонистиката. Се видело дека во рамките на Државниот Универзитет, во рамките на Катедрата за славистика се видело дека има интерес да направиме напори да се отвори еден таков лекторат. Секако сега треба да се потпише договор помеѓу нашиот и нивниот Универзитет и потоа врз основа на тоа да се побара отварање на такво работно место во што своја улога покрај Министерството за образование има и Министерството за финасии бидејќи без финасии не може да се отвори работно место, па следува конкурс и избор. Се работи за подолготраен процес“, вели Мојсова-Чепишевска.
За повеќе од разговорот погледнете го видеото.