Мартиноска: Кај нас се’ уште важи мислењето дека на жените не им е место во политиката

Последниот пример на родово базиран говор на омраза упатен кон министерката Славајнка Петровска навистина кулминираше и е за секаква осуда, но ова не е прв таков случај, вели професорката Ана Мартиноска научничка во областа на фолклорот, литературата и културата, колумнистка на родови и културолошки теми и феминистка и активистка за родова рамноправност.

„Жените во политиката отсекогаш наидувале на овој вид на критика. Генерално, во нашето општество се’ уште важи таа максима дека жените не се за во политика што е очигледно и од репрезентативноста, од присуството на жените, значи ниту во политичките партии ги имаме во доволен број, ниту на раководните функции. Бројот на жените и во законодавната и во извршната власт се секогаш мали и веројатно е дека една од причините е тоа што ним им се суди според двојни аршини. Значи, сите јавни личности кај нас политичарите се славни личности и се гледаат низ призмата на особено популарни јавни личности и природата на нивната работа е да бидат подложни на критика, меѓутоа родовата дискрепанца е многу очигледна, бидејќи секогаш кога сакаме политички да ја дискредитираме жената, фокусот не се однесува на нејзината работа, на нејзините успеси или неуспеси, туку многу брзо се преминува на полето на телесноста, па добиваме критики за тежината, изгледот, убавината, стилот на облекување тоа е сето она што се нарекува „body shaming“ – исмејување врз основа на телесните атрибути кои немаат никаква врска со функцијата што тие жени ја извршуваат. Корените на ова однесување лежат на патријахалното општество и патријахалната култура која се’ уште ја живееме. Таа линија на поделба на моќта во една култура секогаш е поделена на бинарни опозиции, во кои кои јавниот простор им припаѓа на мажите, додека на жените им припаѓа приватниот простор, она што се врзува со домот, куќата, семејството, одгледувањето на децата“, вели профеосрката Мартиноска за Утрински брифинг.

Таа додава дека главна улога за да се променат овие состојби има образованието, особено воведувањето на сексуалното образование и медиумите.
Повеќе од разговорот погледнете во видеото.