Лазаров: Јутјуберите треба да знаат до каде можат да одат за да не предизвикаат трагедија

Живееме во време на дигитални алатки со чијашто помош луѓето создаваат професии. Јутјубер и инфлуенсер би биле дел од таквите нови професии. Последнава недела во Србија имаше два инцидента – со еден јутјубер кој се закануваше со самоубиство и со една инфлуенсерка која се самоуби.

-Кај не би требало да има таква ситуација. Во Србија денес јутјуберите се попопуларни од Цеца, а тоа се млади луѓе кои немаат искуство како да ги поднесат лошите коментари. Богдан Илиќ има над два милиона следбеници. Технологијата денеска направи Богдан Илиќ секој ден да е во етерот, а пејачите вадат по една песна на три месеци и се забораваат, вели јутруберот Стефан Лазаров, кој има над 65 илјади следбеници, за Утрински брифинг.

Тој вели дека филтрација на содржините не прави никој и дека тоа е убавото. Единствената блокада е од Јутјуб кој контролира говор на омраза, пцуење и слично, но македонскиот јазик не се следи. Институции во нашата држава не водат сметка.

-Ако дојде до ситуација како со Кика во Србија, верувам дека ќе има реакција. Треба ние самите да внимаваме. Да не правиме лошо, да не зборуваме лошо за некој лошо да се почувствува и да се самоубие како што се случи со Кика, вели Лазаров.

Тој додава дека откако тој се појавил на Јутјуб почнала да се појавува и публика над 18 години. Помладите го гледаат Стефанатор. Лазаров вели дека зборува и за актуелни теми, а и се виде дека најмногу пари за изборите се потрошија на Јутјуб.

-Има и инциденти, како што беше пуштена снимка од булинг во училиште. Јас тоа не би го направил. Ако пуштам јас едукативно видео ќе имам помалку прегледи од нешто гнасно. Прашање е кој до каде решил да оди за да стане популарен, вели Лазаров.

Целиот разговор погледнете го во видеото