Игор Иванов Изи: Потребен ни е нов закон за филм и времужување со европскиот филмски свет

Во организација на Друштвото на филмски работници на Македонија (ДФРМ), од 9 до 12 јуни ќе се одржи четвртото издание на „Златна рамка“ – филмската ревија на новата македонската долгометражна, документарна и краткометражна продукција. Одбележувајќи го четвртотото издание на манифестацијата „Златна рамка“, Друштвото на филмски работници ќе ги додели наградите „Златна рамка“. Добитник на наградата филмски автор годинава е Кирил Спасески, признанието филмски работник ќе му припадне на Бранко Петровски, додека наградата филмски актер ја добива Сашко Коцев. Оваа година, за првпат ќе биде доделена и почесна награда на странски автор, која ќе му биде врачена на филмскиот актер, режисер и продуцент Драган Бјелогрлиќ.

„Примарно за оваа ревија е промоција и афирмација на македонскиот филм, а важно е и тоа што за разлика од годините порано кога немавме можност да имаме увид, генерално публиката и јавноста. Немавме увид во тоа кој што снимил и каде отишле јавните јавните пари и сметаме дека еден ваков настан е добар пат да биде разбиена целата мистификација околу филмот, се разбира станува збор за пари на даночните обврзници, брем во голем дел кога станува збор за финансирање на филмот и добро е тоа да биде ставено пред очите на јавноста“, вели за Утрински брифинг Игор Иванов Изи, режисер и претседател на ДФРМ.

Тој кажа дека оваа година ќе има помалку филмови кои ќе се прикажат на „Златна рамка“ што е последица на пандемијата кога беше сопрена целата уметничка продукција во Македонија и тоа во филмот допрва ќе се почувствува. „Уште не сме го виделе дното на таа бездна, но се надевам дека брзо ќе излеземе од тоа“, додава Иванов.
Годинава, новитет на „Златна рамка 22“ е социјалната програма „Фокус“, која ќе биде наменета за публиката која од најразлични социјални ограничувања не може да го посети киното „Фросина“. Водејќи се од ова сознание, ДФРМ одлучи филмот да го донесе пред оние граѓани, во институциите каде што се затекнати поради најразлични околности (пензионерски домови, затвори, болници, домови за деца, казнено-поправни домови итн.).

Во рамки на манифестацијата ќе биде одржана и интернационалната конференција насловена „Модели на финансирање и легислатива-регионална соработка, можности и унапредување“ на која ќе учествуваат директори на национални филмски фондови и продуценти од десетина земји.

„Ќе разговараме за теми кои во другите држави се одамна апсолвиран, но не и кај нас а тоа е стандардизацијата на буџетите за филм. Ние имаме голем проблем со тоа што кај нас не постои стандарден буџет за филм. Кога има кратења од парите доделени за филм и кога за тоа ќе ги известиме за тоа колегите копродуценти дека можеби ќе има кратења тие тоа не можат да го разберат“, вели Иванов.

На Златна рамка ќе бидат прикажани филмовите: „Сестри“ во режија на Дина Дума, „Исчезнатиот“ во режија на Арбен Тачи и „Сокриениот“ во режија на Арсим Фазлија, документарниот филм „Брод полн со бисери“ во режија на Александар Зиков и краткометражните филмови „Северен пол“ во режија на Марија Апчевска, „Баскет“ во режија на Димитар Банов, „Денот кога сакав да умрам“, во режија на Петар Џуровски, „Касапот“ во режија на Илчо Царовски и „Проблемот на Тина“ во режија на Радован Петровиќ.

Целиот разговор проследете го на видеото.