Д-р Васев: Лекови против рак има, важно е раното откривање
Денес е Светскиот ден за борба против ракот кој се одбележува веќе 22 години. ОН ја препозна потребата да се истакне оваа болест за да се подигне свесноста и да се потсетиме на луѓето кои го загубиле животот.
-Третина од раковите може да се излекуваат, а една третина од пациентите ќе го загубат животот. Раното откривање на ракот на дојка и дебелото црево е многу битно и за пациентите, за зачувување на нивниот живот, но и за државата која ќе заштеди средства за долготраен третман, вели за Утрински брифинг спец. д-р Никола Васев, директор на Универзитетска клиника за радиотерапија и онкологија.
Тој додава дека е многу битно да се поттикнат луѓето на редовни контроли оти само на тој начин може да се сочува животот. Битно е информирањето на популацијата за да реагира на секој сомнителен знак, а денес информации има и на интернет. Исто така, треба да се едуцираат матичните лекари да ги поттикнат на контроли пациентите кои можеби имаат потенцијал да развијат болест.
-Лабораториите и предклиничките испитувања многу значат за онкологијата. Сега веќе има голем број трудови од секаде од светот од кои може да се учи. Пандемијата направи штета на светски рамки оти луѓето од страв од ковид одбегнуваа да одат на контроли. Освен тоа, голем број матични лекари се разболеа од ковид, вели д-р Васев.
Лековите против рак се скапи и прашање е дали се достапни за сите. Д-р Васев вели дека кога се појави таблетарната терапија беше набавена за клиниките, за жал не се достапни на позитивните листи, но ги има и влеваат оптимизам иако мора да се нотира дека бројот на пациенти се зголемува.
Проследете го целиот разговор во видеото.