Дувњак: Навикнавме да нема случајности во случајностите во Македонија, па така ни во пуштањето на Мијалков од притвор дента кога Заев поднесе оставка

Вчера се случи турбуленција околу пуштањето на Сашо Мијалков од притвор, па потоа повлекување на одлуката со тоа што му се одреди притвор по друг предмет.

-Се случи по секоја цена задржување на големиот „капиталец“ во притвор. Во неколку наврати во судовите е одлучувано за притворот на Мијалков, со гаранции од 1 па сѐ до 11 милиони евра. Тоа е специфична ситуација бидејќи треба да се обезбеди имот кој при евентуално бегство судот може да го наплати. Последната одлука беше донесена од двајца од совет од тројца судии. Тоа предизвика цела лавина, па дури и се вклучи Судскиот совет што беше толкувано како притисок врз судиите, за потоа да се вклучи обвинителката Лиле Стефанова со барање за притвор од 30 дена по друг предмет кој експресно беше одобрен, вели Дувњак.

Банката каде што имот на Мијалков е заложен се согласила да ѝ даде предност на државата, односно банката да стане доверител од втор ред. Станува збор за „Комерцијална банка“. Но ова не е прв ваков случај.

-Во случајот на тутунскиот бос Бајруш Сејдиу исто така се крена голема бура. Тогаш министер беше Михајло Маневски, а претседател на Врховниот совет Јово Вангеловски и тоа заврши со разрешување на судии, потсетува Дувњак.

Сѐ до моментот на изрекувањето на пресудата за Таргет-Тврдина Мијалков се појавуваше на рочиштата, а потоа рече дека се разболел, а и со оглед дека станува збор за имотен човек и земајќи го предвид бегството на Никола Груевски, очекувано е судот да стравува. Освен тоа, државата трпи удари дека постои неказнивост на крупните случаи, па тешко дека државата може да истрпи уште едно големо бегство, вели Дувњак за Утрински брифинг.

-Обвинителството е тоа што треба да го цени ризикот за бегство и претпоставувам дека тоа го сторило. Неблагодарно е кога бегалецот преку Фејсбук од Будимпешта ги коментира изјавите на сведоците во судницата каде што не се појави, вели Дувњак.

Имаше коментари дека има причина зошто се поклопи оставката на Зоран Заев и пуштањето на Сашо Мијалков од притвор.

-Можно е, оти навикнавме да нема случајности во случајностите во Македонија. Наивно е да се очекува дека во една таква ситуација кога има други битни настани да се очекува дека тие ќе го покријат ослободувањето на Мијалков од притвор, вели Дувњак и додава дека следната година се очекуваат неколку првостепени пресуди по низата предмети.

Дувњак претпоставува дека по овие 30 дена притвор Обвинителството ќе бара нови 30 дена притвор. Таа коментира дека обвинетите можат поголема помош да очекуваат од судот во Стразбур одшто од нашите судови.

Целиот разговор погледнете го во видеото