Гелевски: Наградите “Новите” и “Лифт” ги одржуваме и заради меморијата на културниот континуитет

Од 27 до 30 декември во книжарницата „Гладно срце“ по дванаесетти пат ќе се одржи Малиот новогодишен саем на книгата во организација на издавачката куќа „Темплум“. Во рамките на малиот саем се најавуваат седум промоции на книги, и две доделувања на награди: „Новите!“ за најдобар дебитантски ракопис, и „Лифт“, годишната награда за стрип. Доделувањето на тие две награди ќе се одржи во културниот простор Центар-Јадро во вторник, 28 декември.

„Овој предновогодишен саем секогаш имал богата програма, првите изданија на саемот се одрживаа во клубот ГЕМ во Менада што веќе одамна не постои, и овие саеми траејаа по една недела. Една од важните димензии на овој настани и културна програма е не само одбележувањето на важните книги во таа година, туку и на луѓето што починале, имавме трогателни и потресни потсетувања на Игор Исаковски, Роберто Беличанец, Лилјана Дирјан, на Милиана Ленак…така што функцијата на тој мал саем е многу повеќе од продажба на книги, а исто така порано имавме барем по 5 – 6 издавачи, главно помали. Но бидејќи се лоши работите во издавачките кругови, оваа година не успеавме тоа да го направиме, воспоставивме соработка со една мала книжарница во центарот на Скопје, „Гладно срце“. Така што ми беше важно да ја задржиме традицијата на Малиот предновогодишен саем, а и континуитетот кој станува се’ повежен. Меморијата е клучна за било кое цивилизирано живеење, нешто што кај нас исто се заборави. Меѓу многуте работи што се заборавија. Книгите, меѓу другото, се и заради тоа многу важни, тие се најтрадиционален, најбезбеден начин затоа што серверите можат да паданат, се’ се уништува, а тие се чувари на меморијата“, вели за Утрински брифинг, Никола Гелевски, писател и издавач.

Издавачката куќа „Темплум“ во наредните денови почнувајќи од денеска ќе ги промовира книгите „Разнишан свет“ – расказите на Ирена Јурчева, „Животот на животните“ од Џ.М. Куци, Зборникот Попреченост: текстови за инвалидните тела, „Лагата и како ја раскажавме“ од Томи Периш, „Плод на знаењето“ од Лив Стромквист (квир и фем графички романи)