Габер: Петков делува како да сака да постигне промени – и во Софија и во Скопје има нови млади премиери кои би требало да се растоварени од минатото
Деновиве е актуелна посетата на бугарскиот премиер Кирил Петков на РС Македонија. За оценката на оваа посета во Утрински брифинг разговаравме со амбасадорот Виктор Габер.
-Како и за сите нови луѓе коментари на недоверба ќе има. Овој процес ќе трае. Затоа што имаме опседнатост од минатото во актуелната политика кое влијае врз јавноста. Оваа посета ја ставам во контекст на подобрување на надежта дека може во догледно време да дојде до надминување на минатото кое нѐ опседнува, вели Габер.
Тој додава дека трите изборни излегувања во една година предизвикаа вжештување на ова прашање со Македонија што на крајот резултираше со вето.
Сепак, според последните изјави на политичките лидери на Бугарија во последно време барем во официјалните документи не се споменува историјата.
-Во Бугарија влегуваат во постабилна политичка фаза, излегуваат од фазата на судири и политичкиот фактор кој има мандат од четири години може послободно да постапува, грубо кажано, посигурни се во своите фотелји. Едно е да си политичар, друго е да си државник. Политичар се станува, а државник се кали долги години, коментира Габер.
И во Софија и во Скопје има нови млади премиери кои би требало да се растоварени од минатото и минатите обиди за решавање на меусебниот спор.
-Тие не се растоварени и не можат да бидат растоварени од претходните груби постапки на некои политичари. Тие може да придонесат за менување на атмосферата. Историјата ќе остане, но битно е да остане во втор план. Сѐ повеќе од јавноста во Бугарија има расположение за омекнување на тврдиот став, вели Габер.
Петков делува како да сака да постигне промени. Габер коментира дека Кирил Петков, кој би требало да биде порастоварен од минатото, во моментов е ѕвезда не само дома туку и во Европа и може да повлијае врз старата генерација, онаа на претседателот Румен Радев, која има потврди ставови.
Коментирајќи ја вербалната нота, за која некои сметаат дека сме го загубиле и последниот адут против Бугарија, Габер вели дека е многу битен моментот кога ќе се направи чекорот. Стратешката цел се постигнува или чекор по чекор или наеднаш. Овој спор е наметнат спор, а ние сме нов играч на теренот, вели Габер.
Целиот разговор погледнете го во видеото