Вангелов: Европа не е свесна за нашите фрагилни меѓуетнички односи
По она што вчера се случи во Брисел се има впечаток дека не нѐ очекуваат светли времиња во однос на нашите евроинтеграции.
-Првите впечатоци се дека се создаде конфузија дали ќе помине ова во Бугарија, во моментов се разправа во бугарското собрание. Впечаток е дека сѐ се случува во последен момент, дека последните неколку дена на секои шест месеци се клучни. Интегрално никој сѐ уште не го видел овој франциски предлог и се создава конфузија, вели д-р Огнен Вангелов, член на мешовитата Комисија за историски и образовни прашања меѓу Македонија и Бугарија за Утрински брифинг.
Тој додава дека од наша страна таа рамка е одбиена, а што ќе се случува во Бугарија ќе почекаме да видиме.
-Негативното расположение кон ЕУ не е ново, туку само се засилува. Тоа започна од првиот момент кога Бугарија стави вето и дополнително се усложнува ситуацијата со постојано поставување нови барања од страна на Бугарија. Придонесуваат и тврдите изјави од бугарските политичари. Во Македонија тоа се доживува како неможност на ЕУ да реагира на неправдата што ни се нанесува, вели Вангелов.
Тој очекува дека сето ова ќе оди во полза на зајакнување и на зајакнување на негативните чувства кон ЕУ ни и зајакнување на внатрешниот национализам, како што беше ситуацијата кога се радикализираше национализмот во ситуации што сме ги имале со Грција.
-ЕУ не обрнува доволно внимание на нашата фрагилна меѓуетничка ситуација која е условно стабилизирана во последно време, но ако ова се пролонгира со години извесно е дека ќе се вратат старите прашања особено ако се издвои Албанија и ги започне преговорите пред нас. Мислам дека нема расположение во ЕУ за раздвојување, вели Вангелов.
Тој додава дека од друга страна растат гласовите дека треба да се промени начинот на гласање во ЕУ, а за тоа најгласна е Германија.
-Европа не се снаоѓа во оваа ситуација затоа што во последниве 15 години по приемот на Хрватска се загуби интересот за овој регион. Гледате дека Србија и Црна Гора преговараат веќе речиси деценија и не знаеме кога ќе завршат тие преговори. Овој пример не дава простор за оптимизам дури и да се започнат преговорите даи ќе завршат во некое догледно време, вели Вангелов.
Неможноста да се влијае на бугарскиот став е дополнителен проблем покрај незаинтересираноста на Европа за Балканот.
Вестите кои доаѓаат од Бугарија а се поврзани со Мешовитата комисија главно се неточни затоа што ние имаме јасно ограничен мандат и не носиме текстови и натписи на споменици и тврдини, коментира Вангелов и додава дека тие вести се само желба на некои бугарски политички кругови.
-Софија води хибридна медиумска војна со цел да се дестабилизира нашата јавност. Ние сме транспаренти и она што се однесува за нашиот дел од работата во Комисијата ние го објавуваме, додава Вангелов.
Проследете го целиот разговор во видеото