Бишев: За ефикасна економија Македонија мора да се дигитализира

Банкарска профитност, инфлацијата и новите менаџерски и бизнис кадри беа темите за кои во денешен Утрински брифинг разговаравме со Глигор Бишев, банкар и прв човек на Шпаркасе која лани се обедини со Сосиете женерал.

-Провизиите на банките секаде во светот па и во Македонија ќе паѓаат, а банките ќе настојуваат да ги подобруваат своите услуги, вели Бишев.

Во однос на кредитирањето, Бишев вели дека не само што НБРСМ вели дека банките се здрави туку тоа се гледа од профитабилноста на кредитирањето. Банките имаат перспектива преку кредитирањето да го зголемуваат профитот што е потенцијал за понатаможно кредитирање.

-Можно е зголемувањето на кредитните стапки во светот да влијае врз зголемувањето на каматните стапки во Македонија. Тоа ги диктираат пазарите кои ги одредуваат финансиските движења, но и цените на производите. Македонија е апсорбер на цените и на шоковите што се случуваат на пазароите. Инфлацијата е зголемена и во Европа и во САД, а кај нас домашните фактори ако не се придржат за надворешните фактори ќе ја спречат инфлаторната спирала. Тоа е возможно за краткотрајна, привремена инфлација. Добра вест е што билансите на централните банки во САД и ЕУ се зголемија, но паричната маса не се прелеа целосно во кредити, вели Бишев.

Бишев објаснува дека инфлацијата нема да се забрза ако за тоа влијаат домашните фактори. Тој додава дека ако претпоставиме дека во Македонија има продуктивност како во Германија, тогаш и платата ќе биде како во Германија. Ако еден производ се прави за еден час денес, а утре два производа за еден час автоматски платата двојно се зголемува. Денес и работната сила е мобилна.

За економски раст потребни се капитал, технологија и квалификувана работна сила, а на Македонија најмногу ѝ недостасува технологија. Само така се зголемува продуктивноста на работната сила. Освен тоа, вели Бишев, ќе треба да се зајаке инфраструктурата како и дигитализацијата.