Бектеши ексклузивно за УБ: Во вторник на Влада ќе се усвои новиот Закон за заштита на потрошувачите

Ова се драматични економски времиња во кои се соочуваме со низа економски кризи предизвикани оод различни причини. Во склоп на Преспа форумот се разговараше и за оваа тема, а учесниците особено се осврнаа на кризата со природен гас, вели за Утрински брифинг министерот за економија Крешник Бектеши.

-До 2030 година Газпром од Бугарија ги има закупено гасоводите и тоа е нешто што нас нѐ ограничува. Добрата вест е што се вклучивме во проектот Александропулос иако за оваа зима нема да биде готов за да можеме да се вклучиме. Затоа пак ќе го користиме интерконекторот меѓу Бугарија и Грција, вели министерот Бектеши.

До 2019 година имавме многу стар закон за енергетика кој ги немаше инкорпорирано обновливите извори, вели Бектеши додавајќи дека од тие причини се менува законот за енергетика според кој сега секое домаќинство ќе може да монтира фотоволтаици.

-За да се монтираат фотоволтаици потребно е домаќинството да го смени мерачот со таков кој има влез и излез на електрична енергија. Така вишокот на енергија домаќинствата можат со операторот да вршат размена и потоа произведената струја да се компензира или да се наплати, вели Бектеши.

Тој додава дека има приватни компании кои инсталираат вакви панели, а за да се монтираат треба потврда од надзор според Законот за градење, вели Бектеши и додава дека намерата е да се поедностават процедурите за да се стимулира зелената енергија.

Од 1 јули ќе има нов тарифник за наплата на електричната енергија, кој ќе биде скалест, па оттука во која тарифа ќе се испорача струја од домаќинството до снабдувачот, снабдувачот во истиот период ќе има обврска по иста цена да ја пресметува електричната енергија што ја испорачува до тоа домаќинство.

-Нашите проценки се дека до крајот на годината ќе имаме 150-170 киловат часови инсталирана моќност од ваква инвестиција од домаќинствата и компаниите, вели Бектеки за Утрински брифинг.

Владата годинава донесе две мерки – замрзнување на цените и замрзнување на маржите. Министерот Бектеши вели дека врз основа на сите истражувања и консултации овие мерки важеа три месеци, а потоа со консутација со Стопанските комори се појде на регулирање на профитните маржи.

-Не е етички да има маржа од 15 отсто за одредени производи во време на ваква криза. Очекувавме дека според договорите со Стопанските комори компаниите веќе се навикнати на профитни маржи од 4 или 5 отсто. Но, во дел од трошоците – на масло за јадење на пример, 7-8 денари се плаќа за рабат кон супермаркетите. Сега Владата ја укина оваа можност и за супермаркетите и за увозниците. Побарав да се прават секојдневни контроли не само на заштитетните производи туку и на другите производи. За мене е злоупотреба синџирите на маркети да имаат профит од триесет отсто, вели министерот Бектеши.

Во вторник на седница на Владата ќе се усвои Предлог закон за заштита на потрошувачите каде казните ќе бидат многу високи за сите нечесни практики кои се на штета на потрошувачите. Според постојното законско решение казната мое да дојде до 5.000 евра, а отсега казните нема да бидат само парична.

-Има компании кои заработуваат и по 80 отсто на одредени производи и им се исплатува да платат казна и да продолжат со истата нечесна практика. Сега веќе, со новото решение ќе се соочат и со друг тип на казни, ќе има затворање на компании, јавно ќе ги обравиме компаниите, а ќе има и забрана за вршење дејност, вели министерот Бектеши кој појасни дека овој закон е целосно усогласен со европската регулатива.