Атанасов: Пописот е втора голема пресметка меѓу Македонците после референдумот
Резултатите од пописот денеска во студиото на Утрински брифинг и анализираше професорот Петар Атанасов кој смета дека податоците се објавени прерано.
-Сакаме да бидеме зрели и позитивни, но мислам дека Државниот завод за статистика пребрзо ги објави резултатите. Во Босна и Херцеговина на пример која направи прв попис по 1995 година, во 2013 година, резултатите ги објави три години подоцна заради чувствителноста на резултатите. Хрватска од пописот во 2011 година, податоците ги објави една година потоа. ДЗС избрза со објавувањето на податоците, рече Атанасов.
Тој се осврна на процентот на непопишани граѓани, кој е 7 и се однесува на над 130.000 граѓани кои не се изјасниле за прашањата од пописот.
-Седум проценти да не попишете, а да тврдите како влада и институции дека е успех, не е успех, Не може да не попишете 130.000 луѓе. Кои се тие 132.000 луѓе. Ако му веруваме на Павле Трајанов, дека најголем дел се Македонци, тогаш не се точни и вкупните податоци за етничката припадност на населението, Македонци тогаш има многу повеќе од официјално наведните 58,44 проценти. Има големи прашања околу пописот, некои се технички, но може да зборуваме и за политика, рече Атанасов.
Повикот за бојкот на пописот и неизјаснувањето на 7 проценти од населението тој го смета за погубно за државата. Според него постои внатрешна поларизација која не ни дава да одиме напред како држава. Не постои доверба во институциите.
-Ова е втора голема пресметка меѓу Македонците после референдумот. Имаме клучни настани околу кои се рони нашето општествено ткиво. Нашето битие, нашето постоење. Референдумот беше една битка која остави траги врз македонското ткиво. Сега имаме уште една пресметка меѓу Македонците. Ако оваа пресметка не троши, ние сме како феномен на пита кашкавал. Така Југославија ја изгрицкаа, ја истрошија. Македонија се грицка од глувци, кога ќе се изгрицка таа пита кашкавал Македонја нема да има повеќе, дециден е Атанасов.
Според него проблематично е попишувањето на дијаспората, процес кој е сосема непотребен да се направи во моментот со пописот на населението, становите и домаќинствата во РСМ.
Зошто се попишуваше дијаспората. Кој ѓавол ги тераше во овие 30 дена да ја попишуваат дијаспората кога не можат 100.000 луѓе да пронајдат во оваа држава. Па во 2011 беше прекинат пописот во 10 ден, а битката беше дали ќе се попишува дијаспората, потсети Атанасов и додава дека тоа е круцијално прашање и има простор цела година да се попишува дијаспората. Се појавија суштински прашања, не може директорот да дава политички одговори, вели Атанасов.
Целиот разговор погледнете го во видеото
dadada