Арсовски: Сега македонската позиција има поддршка во Европа, а бугарскиот став предизвикува чудење

Многу валкана фаза во актуелната ситуација во бугарската влада, а аналитичарите коментираат дека тоа е руско влијание за да не биде стабилно источното крило на НАТО.

-Бугарија и Македонија ги прекршуваат копјата меѓу источното и западното крило на НАТО, а Русија не ни крие дека е нејзин стратешки план источното крило на НАТО да биде нестабилно. Бугарија сега се наоѓа во чистилиште, бугарскиот премиер Кирил Петков има западна поддршка и затоа се случуваат сите овие работи и афери околу бугарската влада, оти Русија го прави тоа со намера и ова не е првпат. Бојко Борисов на времето на истиот принцип стана премиер, вели аналитичарот Петар Арсовски за Утрински брифинг.

Арсовски вели дека сега притисокот на преговорите меѓу Бугарија и Македонија сега е насочен кон Бугарија, оти Македонија веќе помина низ периодот на политички турбуленции и остана само желбата што поскоро да се продолжи со евроинтегративните процеси. Сега македонската позиција има поддршка во Европа, а бугарскиот став предизвикува чудење.

-Сега притисокот е Бугарија да сфати дека нејзината позиција е налудничава, не може да нѐ натера на сила да прифатиме дека сме Бугари, тоа е апсурдно и Европа настојува бугарските власти и јавност да го сфатат тоа. Имаме суфицит на будали кои се занимаваат со национална осуда на едни или други кои се изјасниле како Бугари или како Македонци, вели Арсовски.

Арсовски вели дека целата меѓународна заедница очекува да се види како францускиот претседател Еманиел Макрон како претседавач со ЕУ може да влијае на решавање на оваа ситуација.

-Ако ова не помине, САД има резервна опција со тоа што распоредуваат дипломатски тешкаши во регионот, вклучително наскоро и во Бугарија. Во наредната година се зголемува веројатноста да дојдеме до решение, вели Арсовски.

Во однос на домашната политичка сцена Арсовски коментира дека генерално сите партии од овој политички естаблишмент имаат низок рејтинг, со минимална предност на опозицијата што е нормално со оглед на сите кризи со кои се соочува сегашната владејачка структура. Голем е процентот на оние кои се разочарани општо од сите и не би излегле на избори и голем е ризикот таа група на луѓе да се зголемува. – А тоа е опасно. Разочараните го создадоа Трамп во САД и поради нив тој стана претседател, коментира Арсовски.