Арсовски: Европа ова нема да му го заборави на Путин, повторно ќе има завеса кон Русија

На Западот сѐ повеќе се разгорува дебатата дека Путин со оваа непромислена интервенција во Украина ги поттикна либералните принципи.

-Комуникациската војна Путин веќе ја загуби иако војната сѐ уште трае. Како се гледа на војната, Путин ја губи битката и во Русија оти тој веќе има в затвор 10.000 демонстранти против војната. Тој со овој чин ја консолидираше западната либерална демократија, вели аналитичарот Петар Арсовски за Утрински брифинг.

Арсовски вели дека Путин не може и нема да има влијание во делот каде што живеат Украинци иако тензијата ќе трае. Европејците ова нема да му го заборават на Путин и во следните пет години Европа ќе се ослободува од руските енергенси и повторно ќе дојдеме до ситуација на некоја завеса кон Русија, вели Арсовски.

-Ние живеме во глобален свет. Новите генерации нема да можат да се вратат на затворена економија кон што Путин очигледно се движи. На глобалното граѓанство му значи како се произведуваат нештата. Русија не зависи од храна, но зависи од технологија. Путин не може да ја инкапсулира Русија и да нема контакт со светот. Впрочем, руските олигарси ги школуваат децата на Запад. Моја проценка е дека не му претстојат добри денови на Путин и дека автохтониот протест ќе биде голем иако не брз, вели Арсовски.

Македонија протера уште пет руски дипломати, а македонски дипломати веќе и нема во Русија. Прашање е како ќе се оправат односите иако има голема поддршка за Путин.

-Тоа е некој атавизам кон минатото. Сепак, повеќето не ја одобруваат војната во Украина. Од друга страна, на прашањето кој е најдобар пријател на Македонија најчест одговор е Србија. А Србија има сосема поинаков наратив од Македонија кон Русија, вели Арсовски.

Вучиќ сака да се наметне и со неговиот наратив на инает и сеир, но ние ја знаеме која е нашата страна. За некои наши граѓани политиката на Србија и Вучиќ, кој е оперетска варијанта на Путин, е поедноставен и поприфатлив избор, коментира Арсовски за Утрински брифинг.

Во врска со односите со Бугарија, Арсовски коментира дека сегашните односи се далеку подобри одошто претходно со владата на Бојко Борисов.

-Ако не постигнеме договор до јуни ќе се отвори прашањето за разделување на Албанија и Македонија за почеток на преговорите со ЕУ. Тоа ќе отвори проблеми кај нас и кај македонската и кај албанската популација. Ќе отвори проблеми и во Бугарија која ќе биде означена како маша на Русија. Имам впечаток дека Борисов и Радев преговараа за да не се договорат. Односот на Петков е поинаков и мојот оптимизам се должи на тоа што, ако ги тргнеме на страна историските и образовните прашања, постои можност Бугарија да го признае македонскиот јазик како засебен, постои можност ЕУ договорот со Бугарија да не го стави во пакетот за влез во ЕУ, а во врска со менувањето на Уставот тоа и не е проблем, вели Арсовски.

Тој смета дека процесот треба да го почнеме паралелно со периодот на скрининг кој трае 18 месеци што е доволно време да се решат некои различни гледишта.

Во однос на пописот секако ќе има реакции, вели Арсовски, а ќе има и проблеми со оние кои по препорака на Левица одбија да се попишат. Истите тие сега ќе реагираат зошто има повеќе Албанци одошто очекувале.