Андоновиќ: Украина добива антиоклопни дронови „Камиказа“ – се навестува голема тенковска битка во наредниот период?

Војната во Украина влезе во својот 44-ти ден. Продолжуваат прегрупирањата на руската армија во источниот дел на Украина. Британското разузнавање потврди дека руските трупи целосно го напуштиле регионот околу Киев и се позиционираат во регионот околу Луганск. Таму, украинските трупи започнаа контра-офанзива, односно се обидуваат да ги повратат позициите во реонот на Донбас, од кои беа потиснати во првите денови од руската инвазија. Според проценките, украинската армија поседува околу 70 илјади војници во оваа област кои жестоко го напаѓаат делот од Донбаската област, Луганск.

Оваа украинска контра-офанзива најверојатно и беше причината за руското менување на стратегијата, односно, силите кои го држеа под опсада Киев, сега да се насочат во оваа област.

Паралелно со овие борбени дејствија Руската армија се уште не воспостави контрола врз Мариопол, Руските војници влегоа во градот но не успеваат да се пробијат кон пристаништето на азовското море кое го бранат околу 3000 украински војници.

Утринава беа ракетирани и одредени цели во Одеса, но засега таму не е регистрирано движење на руската армија.

Се поизвесно е дека во наредните денови ќе дојде до голем копнен судир на руската и украинската армија на истокот од Украина.

Токму зато земјите членки на НАТО и пред се САД ја зголемија и интензивираа испораката на најсофоситицираано оружје за потребите на Украинската армија. Покрај испораката на голем број на противвоздушни системи и проектили, САД и испорачаа на Украина повеќе од 12 илјади против оклопни и 1.400 противавионски системи. Она што е индикативно и навестува дека предстои голема тенковска битка околу воспоставување на контролата врз источна Украина е испораката на американските дронови од типот „Камиказа“ кои уште се нарекуваат „убиец на тенкови“. Тие се наведуваат и директно ги уништуваат оклопните возила.

Сето ова само навестува дека сегашната бројка на жртви во 42 дневната војна во Украина од ден на ден ќе се зголемува.

Дека бројот на човечки жртви во војната е загрижувачки потврди и вчерашното признавање на Москва дека во досегашните борбени дејствија загинале 1.351 руски војник а 3. 825 се ранети. Ова признание беше демантирано од страна на украинската страна и земјите членки на НАТО чија проценка е дека досега загинале околу 10 илјади руски војници. Извештаи за загинати украински војници нема, ниту пак во јавноста се известува за движењето на уркаинските борбени трупи.

Она што е јасно е дека преку испораката на големо количество на софистицирано оружје, НАТО и Украина сакаат да ја одлоговлечат оваа војна со цел да ја потрошат и ослабнат руската воена машинерија. Секојдневните човечки жртви и пред се уништена скапа борбена техника значително ја ослабнува ионака потрошената под санкции руска економија.
На меѓународен план пак, продолжуваат дипломатските блокади кон Русија.

Генералното собрание на Обединетите нации гласаше за суспендирање на Русија од Советот за човекови права на ОН.

Меѓу 93 -те земји кои гласаа за руското суспендирање беше и Србија, што практично ја става оваа држава, на „црниот список“ на непријателски земји на Москва.

Самиот претседател Вучиќ изјави дека Србија била уценета од ЕУ да гласа против Русија и дека стравува од одмазнички контрамерки на Москва кон Србија. Србија беше последната држава во Европа која не воведе санкции кон Русија, за што беше наградена со поволни цени за набавака на руски гас.

Сега, по истекот на договорот во мај годинава, Белград стравува дека Москва ќе ја казни Србија со високи цени за набавка на енергенсите и дека ќе ги расипе традиционалните блиски односи на двете држави.