Славјанка Петровска за УБ: Од денеска почнува процедурата за смена на кадри – постои добра волја за намалување на политичките препукувања

You must need to login..!

Опис

Имавме кратка средба со новиот технички министер и се договоривме заеднички дека треба да се движиме во насока на она што ни е во законски рамки. Зборувавме и за оние 15 раководни позиции кои министерот има право да ги постави, од денеска ја почнуваме таа процедура, но не би ги коментирала имињата додека не се договориме – вели техничката заменик мистерка за внатрешни работи, Славјанка Петровска во денешното гостување во Утрински брифинг.

Обвинувањата од страна на техничкиот министер за внатрешни работи Наќе Чулев не се вистинити, туку се само негови сомнежи, вели Петровска, но додава дека такви сомнежи треба да се пријават во Јавното обвинителство, а не во јавноста. Доколку во најбрз рок не се докажат ќе се сведат на ниво на политичка манипулација. Што се однесува до обвинувањата поврзани со реформата на безбедносниот систем, односно легитимноста на вработувањата, Петровска тврди дека сите вработувања во АНБ и ОТА се законски.


Прашана дали Чулев веќе побарал некаква документација за да ги провери смените кои ги нарече незаконски, Петровска вели дека се уште не побарал таква проверка, ниту пак имал време досега да ја направи. Обвинувањата ги нарече паушални и несериозни.
Наќе Чулев доаѓа од разузнавачките структури, но доколку има некакви информации за постоење на „кртови“ во МВР тоа треба да го пријави во обвинителството – вели Петровска.


„Постои волја за компромиси и за намалување на политичките препукувања, но треба работа затоа што само волјата не е доволна. Најважно е вработените во министерството да не чувствуваат никаков притисок, ниту од него, ниту од мене, ниту од некоја политичка партија“.


“Јас сум подготвена на компромис кога е во интерес на граѓаните и на државата, но во никој случај не можам да прифатам, ниту да се согласам по секоја цена на нешто што би можело да значи рушење на угледот на министерството и загрозување на државата“ – вели Петовска.


Прашана дали очекува блокади во наредните 95 дена, Петровска рече дека е подготвена на се да одговори соодветно.


„Нема да дозволам никаква злоупотреба на државните ресурси“ – тврди техничката заменик министерка.

Напишете коментар

Вашата адреса за е-пошта нема да биде објавена. Задолжителните полиња се означени со *

10 − 8 =