🎥 Трајанов: Новиот парламентарен состав да ги преиспита сите уредби со долгорочен карактер на техничката влада

You must need to login..!

Опис

Долгогодишниот политичар и лидер на Демократскиот сојуз, Павле Трајанов, во Утрински брифинг повторно го повика спикерот Талат Џафери да го свика Собранието, иако смета дека апсолвирано е веќе прашањето со повторно свикување на Парламентот.

„Уставот е јасен, мандатот на парламентарниот состав трае додека не се изберат нови пратеници. Уставниот суд секоаш функционирал така како што му налага власта. Тие се контроверзни, се повикуваат на политичките партии, на нивната одлука, а Уставот има правна процедура. Веќе се исцрпија можностите за свикување на Парламентот. Како може Талат Џафери да присуствува на Советот за безбедност како претседател на Собранието а да не го свикува парламентарниот состав?“, изјави Трајанов.

За да нема дилеми околу датумот за изборите кој се очекува да биде предмет на разговор на утрешната партиска лидерска средба кај претседателот Стево Пендаровски, лидерот на ДС рече дека треба да се види составот на здравствената експертска комисија.

„После 100 години лекарите имаат можност да одлучат и за политички прашања. Мислам дека треба да се види составот на оваа Комисија дали и сега е партиски компонирана, бидејќи таа ќе настапува согласно партиската мантра. Согласно препораките на здравствените експерти, утре на лидерска средба ќе се разговара за изборите, преовладува ставот дека во јуни треба да се одржат“, брифира Трајанов.

Анализирајќи ги ставовите на власта и опозицијата и зошто побрзо избори, Трајанов вели:

„Тендецијата покажува дека анализите се од полза на партиите на власт. Дека граѓаните паметат како државата се справувала со корона вирусот. Опозицијата пак смета дека ќе колабира системот на економски план и тоа ќе предизвика незадоволство кај граѓаните и таму ќе бараат глас. Ние мислиме средината на јуни, опозцијата средината на јули. Добро е што треба да има политички договор оти правно ќе треба да се имплементира. Треба на време да се договорат и нема кој друг да направи промена на изборите, мора тоа власта со уредба на закон. Парламентот не е во функција, изборните рокови се пробиени и потребен е нов договор и да се прекши Уставот и законите и Владата со уредба да го донесе датумот“, тврди Трајанов.

Многу важно е според него да се дефинираат правила како ќе се одвива политичката кампања бидејќи само партиите имаат капацитет да ги менаџираат своите гласачи во случај на собири.

„Треба да се дефинираат многу јасни правила и партиите да ги почитуваат бидејќи тие можат да го менаџираат процесот“, вели Трајанов.

Тој му порача на претседателот Пендаровски да подготви извештај за вонредната состојба и да побара свикување на Парламентот формално правно.

„Знаеме дека нема да има Парламент, но да остане забележано. Новиот парламентарен состав да ги испита сите уредби од техничката влада. Некои уредби со законска сила, кои се со долгорочен карактер, мора да бидат испитани“, потенцираше Трајанов во Утрински брифинг.

Напишете коментар

Вашата адреса за е-пошта нема да биде објавена. Задолжителните полиња се означени со *

eight − 8 =