Некој подолг период пред операција се подготвува и тимот и пациентот, а корона вирусот не беше проблем за премиерната трансплантација на срце, изјави во Утрински брифинг, доктор Сашко Јовев, шеф на тимот кој направи прва трансплантација на срце во Македонија.

„Може да се каже дека секоја операција е уникатна. А трансплантацијата на органи е една од оние кои редовно и успешно се извршуваат во светот. Во светот нема многу донори, а неопходни се органи, особено срце. За да се дојде до операцијата, треба многу години припремање. Не е едноставно да се држи тимот во кондиција, но на крајот кога ќе видиме зошто толку време се држиме во кондиција, тогаш се е јасно. Пациенти има многу, многу од нив на листата на чекање и тие се припремаат во целиот тој период. Прво се подготвува тимот за деталите. Пациентите се спремни. Има неколку работи за кои се дискутира со Министерството за здравство како и координаторот за трансплантација, за пациентите кои се кандидати да бидат испитани за се она што е потребно…да дефинираме дали пациентот навистина заслужува орган, дали би бил повисоко на листата според критичноста и дали задоволува дополнителни услови како малигни заболувања, дуријабилност на телото, некоја болест и слични. Во тој смисол, сите пациенти се проверуваат“, објасни Јовев.

Тимот кој Јовев го водеше, бил известен за форматот, два-три часа пред операцијата, но како што вели Јовев, сите тие се дел од синџирот.

„Има тим кој ќе го експлантира тоа срце, тим кој ќе го имплантира, тим кој подоцна ќе го мониторира тоа срце постперативно, а сите се среќаваме со испреплетување на знаењата. Одредена личност го води тимот, но секој си има клучна улога. Оваа координација, беше очекувана и беше перфектна бидејќи се работи за искусни експерти“, порача хирургот Јовев.

За време на операцијата која траела околу три-четири часа, не се случило ништо непредвидено.

Таа, според Јовев, се одвивала во неколку фази, меѓу кои и употребата на машината за вештачки срца (машина за екстракорпорална циркулација и вон-телесен крвоток) кога практично се спојува организмот, а срцето доколку се корегира или менува, во даден момент го заменува таа.

„Најдраматичен момент е кога се чека дали срцето ќе преработи“, потенцираше шефот на оперативниот тим.

Сега пациентот кој го доби срцето е на интензивна нега и во стабилна состојба.

„Во принцип, перспективата на пациент со пресадено срце е мошне добра. Ние очекуваме нормален пациент. Проблемот е следниот. Тоа срце е страно и телото на моменти се бори со него, тоа е непознато. Сега сме во периодот кога тоа е прифатено и кога треба да го закочиме имуниот систем кој го сфаќа тоа како страно тело и сака да го исфрли. Затоа се користат неколку групи на лекови и дел од нив ќе се користат во текот на целиот живот. Но се очекува сосема нормален квалитет на живот со нормални и редовни активности. Околу 90 отсто од пациентите се враќаат во нормала“, напомена Сашко Јовев во Утрински брифинг.

Тој изрази надеж дека по овој зафат, бидејќи свеста за донарството кај нас не е голема, работите ќе се променат, а во тоа најмногу, вели Јовев, може да помогнат законската регулатива и добра кампања за органодарителство.

„Хрватска има најголем број во светот на трансплантација на срце по глава на жител. И Словенија е блиску“, инфомираше директорот на Клиниката за Државна кардиохирургија.