Шахпаска: Социјалниот дијалог е процес во кој што нема победник и поразен – компромис мора да се најде

You must need to login..!

Опис

Влегува во процедура Буџетот, но заседава и кризниот штаб за ковид кризата. Сѐ уште е заглавен Законот за неработна недела, а уште не се знае кога и дали ќе има реконструкција на Владата.

-Владата функционира непречено, се расправа за кризните мерки, за буџетот… и сите други процеси течат редовно, изјави министерката за труд и социјална политика Јагода Шахпаска за Утрински брифинг.

Во Собранието и собраниските процедури се заглавени неколку закони од сферата на трудот и социјалните прашања.

-Единствениот заглавен закон е оној за недела неработен ден. Заглавен е на комисијата чијшто претседавач е од ВМРО-ДПМНЕ, иако имаше еден обид за отворање. Се надевам дека пратениците ќе сфатат колку е важен овој закон за граѓаните и синдикатите кои секојдневно се јавуваат. Само 8 отсто од вработените ќе работат во недела, а сите тие ќе добиваат 50 отсто поголема дневница. Решението е многу добро и ќе направи добар баланс меѓу приватниот и службениот живот на граѓаните, вели министерката Шахпаска.

Во земјава има малку облици на пазарот на трудот кои ќе овозможат легална зголемена работа за оние кои сакаат и можат да работат повеќе. Кај нас не постои таквата можност за личен избор, не може да се работи на две места, две смени и слично, а има потреба од решавање на ова прашање.

-Министерството за труд работи на системскиот Закон за работни односи. Досегашниот е стар и надминат. Новиот закон е готов и изготвен е во соработка со синдикатите и меѓународните организации на трудот. Не сакавме да го пуштиме во дебата пред изборите. Но, тој закон ќе донесе новини што ќе задоволат барањата. Најголема новина во законот е регулирањето на работата на определено време. Мора да има компромис што ќе ги задоволи и работниците и работодавачите, вели Шахпаска. -Новиот закон одредува колку е минимумот работни часови неделно и колку може работникот да биде ангажиран прекувремено.

Во Македонија има тенденција да се зголемува просечната плата, но тој тренд не го следи и минималната плата.

-Минималната плата расте. Од помалку од 9.000 денари колку што порано земаа текстилните работници, сега минималната плата е 15.000 денари и покрај пандемијата. Ние не се откажуваме од тоа минималната плата да расте. Ќе расте заедно со економијата, вели министерката

Немаме многу информации како стојат работите со странските инвеститори во однос на третманот на работниците, оти не се само платите во прашање кога станува збор за добар третман.

-Ние не гледаме дали е домашен или странски инвеститор. Законите важат за сите, а работниците треба да добиваат плата, одмор и услови за работа. Странците бараат да се работи како и досега и во недела и сменски, но ако земете како треба да се работи во нивните земји, така треба да се почитува и нашиот закон. Каде што има прекршување, има и санкции, вели министерката Шахпаска.

Во јавноста има впечаток дека Министерството и Владата се понаклонети во дијалогот кон работодавачите отколку кон работниците.

-Не се согласувам дека ја штитиме страната на работодавачите, работиме за заштита на правата на работниците. Дебата за законот за недела го покажува тоа, вели Шапаска за УБ.

Денеска се одржа седница на кризниот штаб и се очекува да се види дали ќе следуваат нови мерки за новиот бран на ковид кој веќе ја зафати Европа.

-За тоа што треба да се преземе кажуваат експертите кои ја следат состојбата и предлагаат мерки за заштита на јавното здравје. Состојбата во градинките е стабилна – има само 5 позитивни деца и 21 вработен од сите градинки. 80% од воспитувачите се вакцинирани. Кои мерки и да ги донесете ако граѓаните не ги почитуваат тогаш е залудно. Апелирам на личната одговорност на граѓите. Само што почнавме да ја опоравуваме економијата не ни треба нов бран, вели Шахпаска.

Јагода Шахпаска е и висок претставник на СДСМ, а јавноста ја интересира што се случува во партијата по сите превирања по локалните избори и оставката на Зоран Заев.

-СДСМ покажа дека е одговорна партија која влезе да ги решава најтешките прашања. Градиме општество во кое се почитуваат правилата. СДСМ нема да ја остави државата на цедило, вели Јагода Шахпаска, министерка за труд и социјална политика за Утрински брифинг.

Проследете го целиот разговор во видеото

Напишете коментар

Вашата адреса за е-пошта нема да биде објавена. Задолжителните полиња се означени со *

three + 7 =