Трајкоска: Напливот на информации и дезинформации нема да престане, но треба да бидеме подготвени да живееме во таков свет

You must need to login..!

Опис

Во организација на Институтот за комуникациски студии (ИКС) денеска и утре ќе се одржи онлајн Меѓународен симпозиум за медиумска писменост и критичко размислување.

Целта на симпозиумот, како што велат од ИКС, е да ги актуализира прашањата на критичко размислување и медиумска писменост како глобален приоритет, со посебен акцент на високото образование.

Симпозиумот ќе обедини на едно место професори, истражувачи, студенти и експерти кои ќе дискутираат и презентираат модерни пристапи во областа на медиумската писменост и критичкото размислување.

На настанот се планирани неколку сесии на кои ќе се презентираат и дискутираат предизвиците на академската заедница во осовременувањето на медиумското образование, ќе се разговара за новите трендови во медиумската и дигиталната писменост, а ќе се презентираат и наодите од истражувањето на медиумската писменост во високото образование во земјава кое ИКС го спроведе во ноември/декември 2021.

Медиумската писменост ни треба на сите, а темата што се опфаќа е многу широка. Како дел од проектот „Младите размислуваат“ дебатата за медиумската писменост се осврнува на внесување на медиумското образование на факултетите, вели Жанета Трајкоска, директорка на Институтот за комуникациски студии за Утрински брифинг.

-Денес ќе зборуваме за брзината со која се менува образовниот процес, а јас се залагам да има инклузивен пристап кон медиумите за да научиме како да ги читаме и селектираме вестите то ги читаме, вели Трајкоска.

Со технолошкиот развој ние сите стануваме креатори на содржини, иако не и новинари, па во нашите кругови на социјалните мрежи лесно им веруваме на нашите пријатели и ако тоа се поклопува со нашите ставови лесно потпаѓаме на дезинформации, вели Трајкоска и наведува дека влијанието на дезинформациите е големо сега кога се шират различни теории на заговор за ковид кризата.

-Сите ние треба да поднаучиме нешто, вклучително и новинарите, да се потсетиме како да препознаеме лажна вест, вели Трајкоска.

Лошите вести будат повеќе интерес, оттука повеќе кликови, а повеќе кликови носат повеќе пари. Оттука, се поставува прашањето на регулација на медиумите.

-Јас сум за саморегулација на медиумите, а ние новинарите треба со прст да покажеме кон оние кои не се професионални. Во Америка Твитер и Фејсбук бришат акаунти и казнуваат луѓе и медиуми кои шират лажни вести. Од една страна треба да се едуцираме и да ни биде јасно дека без професионално новинарство нема реално информирање. И ние новинарите треба да бидеме посамокритични, вели Трајкоска.

Трајкоска вели дека не е конфликт на интереси ако се инсистира и на т.н. „граѓанско новинарство“ со тоа што ќе се наметнат основни норми и граници за тоа што треба и како треба да го прават тоа граѓаните.

-Ние не можеме да влијаеме на трендовите на големите медиумски пазари, но можеме да се потрудиме да влијаеме ние тука да станеме подобри луѓе и да бидеме свесни за нашата одговорност за изреченото. Напливот на информации и дезинформации нема да престане, но ние треба да бидеме подготвени да живееме во таков свет, заклучува Трајкоска за Утрински брифинг.

Целиот разговор погледнете го во видеото

Напишете коментар

Вашата адреса за е-пошта нема да биде објавена.

sixteen − 3 =