Марија Апчевска: Во Кан одиме релаксирано со надеж дека ќе се претставиме најдобро што може

You must need to login..!

Опис

Краткиот игран филм „Северен пол“ на македонската режисерка Марија Апчевска влезе во селекцијата за Златна палма на престојниот 74. Кански фестивал. Ова е првпат македонски краток филм да се натпреварува за Златната палма. „Северен пол“ е избран меѓу 10-те кандидати за престижната награда од пријавените 3.739 филмови. Канскиот филмски успех почнува на 7 јули и ќе трае до 17 јули.

„Во Кан одиме релаксирани, самата селекција е огромен успех за нас, немаме големи очекувања, се надеваме дека ќе се претставиме во најдобро светло и со нетрпение ја очекуваме реакцијата на публиката. Што се однесува до екипата, со директорот на фотографија, Владимир Самоиловски ова веќе ни е трет филм, со продуцентот Роберт Насков ова ни е втора соработка со него претходно соработувавме на серијата „Зоки Поки“. Во главната улога е Антонија Белезелковска и со неа исто така ова ни е втора соработка, таа настапи во мојот претходен краткометражен филм „Амби“ и тогаш имаше 12 години. Од страна на нашиот копродуцент од Србија беше монтажерот Драган Вон Петровиќ, костимографката Билјана Гргур, дизајнери на звук се Игор Поповски и Бојан Паликуќа, навистина еден одличен тим со кој имавме навистина соработка и имав константна поддршка во сите одлуки што ги носев во предпродукцијата и за време на снимањето. Снимавме на филмска лента и тоа бараше дополнителна концентрација и дисциплина и верба во тоа што го правиме.

Филмот е снимен на 16-милиметарска лента пред се’ заради естетските квалитети што ги носи филмската лента, сликата што ја дава е во коресподенција со приказната на филмот, а понатаму и заради искуството што сакав да го стекнам, бидејќи филмската лента носи некои други ограничувања и бара многу повеќе подготовки и сакав повеќе да научам. Овој вид филмска лента дава еден несовршен изглед и тоа одговара на приказната, бидејќи и главниот лик во филмот, исто така, не е совршен лик, си има свои недостатоци и не се вклопува во средината а дополнително, приказната се случува во зима и самото време е тмурно и сето тоа одговараше на тоа како го замислував овој филм. Тематски филмот се занимава со осаменоста и неможноста да се комуницира, нешто што сега е уште поактуелно отколку кога било претходно“, вели за Утрински брифинг, режисерката Марија Апчевска. Таа најави дека по ангажманите за Канскиот филмски фестивал ќе се фокусира на својот прв долгометражен филм за кој веќе има готово сценарио.

Напишете коментар

Вашата адреса за е-пошта нема да биде објавена. Задолжителните полиња се означени со *

4 − 2 =