Клупата на Горан Стефановски е готова, едвај чекам да си дојде во Дебар Маало, вели Игор Стефановски

You must need to login..!

Опис

Клупата на Горан Стефановски е сосема готова! Едвај чекам да си дојде на своето предвидено место и да можеме да си седнуваме на неа со него. Е сега, не се знае кога ќе имаме можност да се собереме во Дебар Маало за поставувањето, ама важно е готова, напиша на Фејсбук неговиот син Игор Стефановски.

Во Утрински брифинг, Игор истакна дека автор на бистата на Горан Стефановски е човек од Англија со големо искуство.

Заврши одлична работа. Мене ми беше важно да кажам дека е готова. Сега треба да организирам транспорт во Македонија. Идејата е да биде во Дебар маало, на крајот од ул „27 април“, изјави во Утрински брифинг Игор Стефановски.

-Целта на Здружението е едноставна: Опусот на Горан да биде секогаш на дофат, во различни форми. Многу луѓе го сакаа Горан и би сакал да работиме заедно тој да биде што подостапен кај нас. Имам многу идеи, но важно имаме чадор под кој што можеме неговото дело да го направиме подостапно, вели Стефановски кој во Утрински брифинг прочита и еден дел од Горан Стефановски во која тој говори за важноста на културата:

Сите живи суштества се раѓаат со инстинкт за преживување. Пајаците, за да преживеат, ткајат мрежи. Луѓето, за да преживеат, ткајат приказни. За нас нема ништо поважно од овие приказни. Тие се с’ржта на нашиот живот, ‘рбетот на нашиот идентитет.

За да преживееме во суровиот свет, нашата приказна мора да е точна, втемелена во знаење и проникливост. Погрешната приказна може скапо да нѐ чини, да нѐ одведе во заблуда, во ќорсокак, па дури и во смрт. Нашите пејзажи постојано се менуваат, па затоа и нашите приказни мора постојано да се уточнуваат. Приказната е мапа. Ако мапата не соодветствува на пејзажот, ние сме изгубени.

Сите ние имаме насушна потреба да ја разбереме приказната за себе, да се огледаме, да се споредиме себеси со другите. Копнееме по мајстор раскажувач кој ќе ни ги протолкува руните, ќе ги поврзе причините и последиците, и ќе ни каже каде сме и кои сме.

Приказната е понекогаш смешна, понекогаш тажна, понекогаш е и едното и другото. Но едно е јасно: ниедна култура не може да опстане без точна, снажна и автентична приказна! Всушност, културата е токму таа точна, снажна и автентична приказна.

Напишете коментар

Вашата адреса за е-пошта нема да биде објавена. Задолжителните полиња се означени со *

ten + 16 =