Врз основа на рејтингот на македонската ракометна федерација, ЖРК Куманово како второ пласирана екипа обезбеди директен пласман во групната фаза од Лигата на шампионите, по откажувањето на Металург Скопје.

Поднесена е и официјалната документација од кумановци, откако Федерацијата го имаше пријавено клубот за слободното место. Очекуваат поголема финансиска помош од Општината во однос на минатата сезона.

-Ние оваа година бевме првопласирана екипа во женскот ракометно првенство. Со 60% пдограни натпревари немавме пораз. РФМ донесе непопуларна одлука и женското првенство да се прекине. Далеку сме пред другите противници но влеговме во тој еден ист кош.

ЖРК Вардар е заслужен за ова место, бидејќи до сега со добрите игри на овој клуб ние добивме можност да заиграме во најелитното првенство.

Пријавено е натпреварите да се играат во кумановската спортска сала, но треба да се реновира според условите на Европската ракометна федерација. Доколку реновирањето не заврши пред почетокот на групната фаза, тимот би требало да игра во Скопје, изјави за Утрински Брифинг, Бобан Пеовски, претседател на ЖРК Куманово.

Како една од поважните работи секако е ростерот на тимот. Од клубот велат дека се работи на тоа, и ќе бидат повикани македонски репрезентативки кои моментално се без ангажман. Ова пред се ќе биде голем напредок за кумановскиот и македонскиот ракомет, но ќе донесе и големо искуство кај ракометарките.

Пеовски вели дека дел од финансиските средства се обезбедени, но во тек се и преговори со неколку реномирани компании, затоа што имаме право на два спонзори. Минатогодишната помош што беше поделена на спортските колективи, очекуваме да биде поголема поради овој успех и шансата да се гледа врвен ракомет во нашиот град.