Димушевска: Минатата година биле убиени 4 жени само затоа што се жени

You must need to login..!

Опис

Фемицидите – родово базираните убиства на жени од страна на мажи се „скриена пандемија“ која ја загрозува безбедноста на голем број жени и девојки. Од вкупно 26 убиства на жени, извршени во државата во периодот од 2017 до 2020 година, 22 се квалификувани како фемициди, со оглед на тоа што сторители биле сегашни или поранешни партнери или други членови на семејството на жртвата, покажува Анализата на случаи на фемициди.

„Фемицид претставува родово базирана форма на насилство врз жени и секако е најсериозната форма која завршува со смрт на жената и е насилство, односно убиство на жена само затоа што е жена. Во нашиот Кривичен законик не е препознаен како посебна форма и не е криминилизарана, секако убиството е дел од Кривичниот законик и како отежителна околност е предвидено убиство во семејно насилство. Но тоа не е доволно за да се разбере и соодветно казни сторителот на ова тешко кривично дело. Анализата на случаи на фемициди што ја промовираме на 26 ноември е направена со увиди во судските предмети за убиените жени. Индикатори беа пол, возраст, односот помеѓу жртвата и сторителот, постоење на претходно пријавено насилство, поседување на оружје на сторителот итн. И од оваа анализа произлезе еден општ заклучок е дека наодите се поклопуваат со претходната анализа за периодот помеѓу 2008 до 2016 година. Иаково 2019 и 2020 година се бележи помал број на убиства на годишно ниво. Во анализата не навлеговме во можната причина зошто е тоа така. Сепак, повеќе од 75 отсто од жените што се убиени, независно од тоа колкава е бројката на годишно ниво, се убиени од интимниот партнер поранешен или сегашен. Така, во 2020 година има четири убиени жени и сите биле убиени од интимен партнер и во ниеден од овие случаи претходно не било пријавено насилство, а за тоа подоцна сведочеле роднини и пријатели на жртвата. Па сега се поставува прашањето како постапуваат надлежните институции откако ќе се пријави насилството и дали можеби кампањата „16 денови активизам против насилство врз жените и семејно насилство“, која ја спроведуваме да ги охрабриме жените да пријават насилство, не треба повеќе да ја насочиме кон институциите кои се надлежни и како тие постапуваат“, вели за Утрински брифинг, Елена Димушевска, извршна директорка на Националната мрежа против насилство врз жени и семејно насилство.

Според неа, една од главните препораки е измена и дополнување на Кривичниот законик, односно фемицидот да биде посебно кривично дело, или дополнување на отежнителните околности при квалификација на основното убиство со попрецизно дефинирање на родово базираното насилство, по примерот на европските земји.

Напишете коментар

Вашата адреса за е-пошта нема да биде објавена.

7 − 4 =