Бислимовски: Македонија има најниска цена на нафтените деривати во регионот

You must need to login..!

Опис

Новите цени на на нафтените деривати, кои треба да се објават денеска на пладне, ќе бидат во границите на очекуваното, нема да одат нагоре, информираше денеска во Утрински брифинг, Марко Бислимовски претседател на Регулаторната комисија за енергетика (РКЕ).

Бислимовски потенцираше дека досега се нема случено цената на нафтата да оди негативно, а ситуацијата во САД со плаќањето на произведувачите на нафтени деривати за да се ослободат од постоечката, е поради искористеноста на резервоарскиот простор.

На европските берзи, кои РКЕ ги користи, такви случаи, таков пад немаше.

Бислимовски смета дека поради падот на побарувачката ќе се одразува на цената на нафтатата.

„Според нафтени аналитичари, ова може да доведе до повратен  ефект од присилно  намалување на понудата со нафта на пазарот и поради што може да дојде до уништување на производните нафтени потенцијали, а потоа и нивната обнова ќе биде скапа и процесот ќе биде подолготраен“, вели тој во однос на светските случувања со нафтата.

Во месец март, РКЕ бележи намалување на побарувачката меѓу 30 и 40 проценти, а истиот тренд ќе биде дури и подрастичен за април бидејќи имавме и викенди со полициски час, а тогаш потрошувачката е најголема.

Во однос на акцизата на горивата, Бислимовски вели:

„Ги разбирам причините за разговорите за зголемување на акцизата, бидејќи приходите се драматично паднати поради намалувањето на потрошувачката, а и на цените на нафтените деривати. РКЕ поддржа изедначување на акцизата на дизелот со екстра лесното со цел да се намалат малверзациите кои се случуваа пред се од транспортните компании кои го користат екстра лесното масло наместо дизелот. Во овој момент цената на нафтените деривати во нашата држава е сепак убедливо најниска во регионот и споредено со земјите членки од ЕУ. За репер, цената на дизелот ако е 0,73 евроценти, во Бугарија е 0,95, во Србија 1,25, во Албанија 1,34 евроценти и тоа е пред се поради ниската вредност на акцизата“, вели претседателот на Регулаторната комисија.

Тој не очекува компаниите во Македонија да ги згаснат своите капацитети.

„Верувам дека минатите месец два кои беа покритични, компаниите кои претходно имаа остварено профити, ќе продолжат да работат. Верувам дека компаниите кај нас имале можност да обезбедат залихи и дека ќе можат да се вратат во иста или слична насока во своето работење“, вели тој.

Во однос на плаќањето на домаќинските режиски трошоци, Бислимовски вели снабдувачите на електрична и топлинска енергија ќе мора да се прилагодат на опаднатите финансиски можности на граѓаните.

„Бевме меѓу првите кои им препорачаа на снабдувачите да не исклучуваат домаќинства од електрична и топлинска енергија бидејќи имаме една категорија на граѓани која сериозно е погодена од оваа криза со корона вирусот. Имаме категорија на граѓани кои ќе прима и минимална плата и со цел да им излеземе в пресрет на граѓаните, овозможивме трошоците за електрична енергија и парно да можат да се плаќаат на рати и без камата. Снабдувачите во својата база на податоци веќе ги имаат сите оние кои примаат социјална помош,а за зголемениот број на граѓани сега, снабдувачите ќе контактираат со Министерството за труд и социјална политика  која ќе има база на податоци за граѓаните кои имаат финансиски товар“, објасни тој, дополнувајќи дека потрошувачите ќе бидат известени за можноста за покривање на режиските трошоци, дали сакаат да плаќаат на рати или редовно со оглед дека има различни ситуации.

Напишете коментар

Вашата адреса за е-пошта нема да биде објавена. Задолжителните полиња се означени со *

nine − 3 =