Андоновиќ: Со полн мандат, Вучиќ тргнува во решавањето на финалниот косовски статус

You must need to login..!

Опис

Откако слегна еуфоријата од историската победа на партијата на Вучиќ на завчерашните парламентарни избори, српскиот претседател започнува со тешка и обемна политичка агенда околу преговорите за косовскиот статус.

На одржаните парламентарни избори, партијата на Вучиќ СНС освои рекордни 63 проценти гласови и така го доби мнозинството во парламентот, а со тоа и целосната одговорност за решавањето на повеќе деценискиот косовски проблем. Особено што и второрангираните социјалисти на Ивица Дачиќ и третата по освоени гласови партијата СПАС на Александар Шапиќ, најавија коалиција и влез во новата влада, што српскиот парламент го остава без ниту еден опозиционен пратеник.

Одговорноста сега е уште поголема ако се земе во предвид дека Вучиќ ја има целосната власт, па оттаму и нема да може да ја подели евентуалната политичка одговорност за резултатот од преговорите и договорите околу иднината на поранешната јужна покраина Косово. Особено што доколку биде протуркано се поизвесното решение, американскиот предлог за демаркација на границата односно размена на територии меѓу Србија и Косово, во српскиот парламент ќе мора да дојде до изгласување на промена на српскиот устав, и отстранување на преамбулата за статусот на Косово, чин кој не е популарен кај ниту една гарнитура која е на власт.

Оваа како и која било друга промена се во рацете на парламентарното мнозинство на Вучиќ. Немањето на парламентарна опозиција како и бојкотот на останатиот дел од опозицијата беше искритикуван од ЕУ, но сепак Брисел ја поздрави победата на Вучиќ

-И покрај тоа што учесници во парламентарните избори во Србија имаа можност да водат кампања и темелните вредности се почитуваа, изборот на гласачите беше ограничен поради огромната предност на владејачката партија и промоцијата на владините политики од страна на повеќето главни медиумски куќи, стои во заедничката реакција на шефот на европската дипломатија, Жозеп Борел и еврокомесарот за проширување, Оливер Вархеји.

Сепак , неполни 12 часа по завршувањето на изборите и прогласувањето на победата на Вучиќ, во Белград допатува специјалниот преставник на ЕУ Мирослав Лајчак кој изјави дека Унијата сака сеопфатен договор меѓу Белград и Приштина што засекогаш ќе ги реши сите отворени прашања. Претходно високиот претставник на Европска Унија за надворешна политика и безбедност Жозеп Борел изјави дека ЕУ не може да тврди дека е меѓународен политички фактор ако не успее да го реши прашањето за Косово.

Наспроти ова, политиката на Русија останува непроменета. Москва е против нормализација на односите на Белград и Приштина, што ќе им го отвори на Косово и на Србија патот во ЕУ и НАТО. Зачувувањето на сегашниот статус ќе ѝ овозможи на Москва и понатаму реално да влијае врз текот на „политичката игра“, сметаат аналитичарите.

Што се однесува до САД, администрацијата на Трамп преку ангажманот на Ричард Гренел ја врати во игра таканаречената „булдожер дипломатија “ и најави состанок меѓу претставниците на Белград и Приштина и започнување на преговори по едногодишниот прекин на контактите. Вашингтон сака да издејствува што побрзо решавање на косовскиот статус, ставајки го на маса планот за демаркација на границите или уште попрецизно, размена на територии. Оттаму и тешката задача на српскиот престедател Вуќиќ кој најверојатно, под притисок на Вашингтон ќе мора да прифати нешто што можеби одбивал сите овие претходни години. Како мала утеха веројатно е средбата со рускиот претседател Путин во Москва од која Вучиќ можеби очекува некаква сламка на спас во позицијата на Москва. Сето тоа како увертира на средбата на 27 јуни во Вашингтон со косовскиот премиер Хоти, по која ќе биде појасна насоката и намерата на Вашингтон за посредство во постигнувањето на компромисното решавање на статусот на Косово.

Напишете коментар

Вашата адреса за е-пошта нема да биде објавена. Задолжителните полиња се означени со *

three + 19 =