Шекеринска: Ќе поддржиме дополнителни рестрикции кога ќе мора, имаме договор за снабдување со вакцини а приоритет ќе бидат најранливите

You must need to login..!

Опис

Прашањата на домашен план во борбата со Ковид 19 пандемијата како и политичката одлука на Бугарија да стави вето на отпочнување на пристапните преговори со Европската Унија се главните прашања на кои министерката за одбрана, Радмила Шекеринска, денеска одговараше во Утрински брифинг.

Во поглед на пандемијата, Шекеринска вели, здравствениот систем е приоритет на Владата, а кога се работи за Бугарија, ветото во ЕУ смета дека е пораз и за Македонија и за ЕУ и за Бугарија.

„Владата после изборите покажа дека подеднакво води сметка за здравјето но се труди да го минимизира притисокот и врз економијата, работните места и правата на граѓаните. Строгите мерки ќе ги применуваме тогаш кога мораме. Затоа сега одевме на ширење на капацитетите, но притисокот врз здравството во моментов е навистина голем. И на последните седници на Влада дискутиравме за дополнителни рестрикции. По две недели од одлуката за задолжително носење маска на отворено, сега треба да ги видиме ефектите. Ако здравствените авторитети сметаат дека треба да се оди на одредени рестрикции, ќе ги поддржиме. Празниците ќе бидат сериозен предизвик, поради навиките. Секојдневно се следи ситуацијата и навистина сметам дека здравствениот систем во моментов е приоритет“, изјави Шекеринска.

Таа потенцира дека фокусот на вастите е да не дозволат да се надминат здравствените капацитети и затоа се разговара за дополнителни рестрикции.

„Никој не сака да носи маска но мораме. Вториот бран на вирусот е многу потежок за менаџирање од првиот“, дополнува таа.

Кога се во прашање вакцините пак, Шекеринска сподели дека донесена е одлука Северна Македонија да биде дел од глобалното и европското снабдување, а за тоа се обезбедени и пари и процедура за веднаш штом бидат на располагање вакцините, да добиеме одредени дози.

„Фокусот според приоритет ќе бидат најзагрозените категории. Пред две седници на Владата донесовме одлука за ново тело за имунизација кое ќе прави план пред да стигнат вакцините“, рече министерката.

Таа во пресрет на состанокот на Советот за безбедност кај претседателот Стево Пендаровски, каде што ќе се дискутира за понатамошно менаџирање на пандемијата, ја објасни и улогата на армијата, која главно вели, учествува во логистика и обезбедување на медицински кадар.

„Огромен број од медицински персонал асистира во 8-Септември, отстапивме неколку санитетски возила и еден дел од епидемиолозите и сестрите продолжија да учестуваат во епидемиолошките анализи. Даваме логистика со магацини, со транспорт…за да армијата можеме повеќе да ја искористиме, мораме да носиме и други одлуки. На Советот на безбедност ќе се разговара за евентуално прогласување на кризна состојба, што ќе ни даде шанса армијата да и асистира на полицијата. Ќе се дискутира денеска но ова е шанса институцијата која е најпозната по дисциплина да ја употребиме во решавање на проблем кој бара дисциплина“, вели Шекеринска.

Осврнувајќи се на политичките теми и односите на Скопје и Атина во рамките на ЕУ, министерката за одбрана Радмила Шекеринска, вели Владата ги добила првите загрижувачки сигнали уште од моментот кога беше усвоена преговарачката рамка.

„Работевме на прашања и во дискусии со нив [Бугарија] и со други земји-членки и она што се случи, да нема одлука е минус за нас, за ЕУ и за стратешката позиција на Бугарија во регионот. Она што мислам дека е јасно е дека како Влада во последниот период покажавме дека знаеме да правиме компромиси таму каде што треба но и да кажеме „не“. Имаме обврска и да имаме добри односи со соседите но и пред се да си ги тераме домашните работи со силно темпо и нема да дозволиме да се „бугаризира“ европската агенда на државата. Во моментов неподелен е ставот во ЕУ дека ветото им штети на сите и дека тоа треба да се надмине, не следната година туку до крајот на годинава и германското претседателство овде многу помага“, рече таа.

Според неа, важно е да се наоѓаат решенија, а не да се замрзне уште еден спор со соседите.

„Ние немаме комплекс, никој не може да ни го одземе тоа дека сме Македонци и дека говориме  македонски јазик, ама за многу теми треба да најдеме начин да ги решаваме и да ги поправаме грешките. Јас сум оптимист дека се работи за решлив проблем и не треба овој спор да го оставиме на некоја следна генерација“, потенцираше Шекеринска при гостувањето во Утрински брифинг.

Напишете коментар

Вашата адреса за е-пошта нема да биде објавена. Задолжителните полиња се означени со *

one × one =